Shillong, Risaw 16
Ki pulit ki la ïoh ban pyllait im noh ïa uwei u rangbah uba la lait da ka said na ka kti jong ki paidbhur kiba la thmu ban bom shnong ïa u halor ka jingsuba ba u lah ban dei u ‘Menshohnoh’.
Ha ka kyrwoh na u Superintendent of Police jong ka East Khasi Hills u Bah Vivek Syiem, u la ïathuh ba ha ka step jong ka 16 tarik mynta u bnai, kata ha ka por kumba 8 baje eiei, la ïoh pdiang ka jingpyntip na u Rangbah Shnong ka Lawmei, Diengiei ba ki paidbhur ki la thmu ban bom shnong ïa uwei u briew halor ka jingsuba jur ba u lah ban dei u ‘Menshohnoh’.
U SP u la ïathuh ba mar ïa ïoh jingtip mar-mar ki pulit na thanad Lumdiengjri ryngkat bad ki SOT ki la leit sha Lawmei, ha kaba ki la ïoh ban pyllait bad shimti noh ïa utei u rangbah, na ka ïingdorbar shnong, ha kaba la set ïa u da ki nongïalam shnong ryngkat ka jingpahara na ki paidbhur kiba la ïalum paidbah.
Une u rangbah uba la poi ha shnong Lawmei u dei uba la tip kyrteng kum u Nicolas Lyngkhoi ba la 39 snem bad uba dei na ka shnong Ktiehthawiar, Mawshynrut bad u dei uba trei kum u nongot dieng ha ka khlaw ha Umiam.
Katkum ka kyrwoh na u SP, la ïathuh ba myn ha ka 15 tarik mynta u bnai ha ka por kumba 9 baje mynmiet, utei u rangbah u la mih na Umiam ban leit sahkai sha ïing ki bahaïing ha shnong Umthlong ba hap ha ki thaiñ Sohiong, hynrei hadien ba la poi ha shnong Lawmei bad namar ba la kem khriat ka suiñ bneng, une u rangbah u la leit ban sah miet noh ha kawei ka sem kaba don ha shnong Lawmei. Ha ka 16 tarik kata ha ka por kumba 6 baje eiei, u trai jong katei ka sem u la lap ïa une u briew bad sdang ban shon dur ha ryngkat ka jingkhot pyrta ïa ki para marjan.
Ïa utei u rangbah la pynkit noh sha thanad Lumdiengjri bad hadien la phah sha Civil Hospital ban leh ïa ka medical check-up bad na ka kaiphod kaba la ïoh la lap ba utei u rangbah u la mynsaw malu mala.
