Shillong, Risaw 16
Ki khun ki hajar ka Hima Langrin ha ka 16 Tarik u Risaw 2025, ki la leit ban ïa kynduh ïa u Executive Member ka Khasi Hills Autonomous District Council, u Bah Denzil Raynard Chen, u ba Khmih ïa ka tnad Elaka, ban dawa weng noh ïa u Nongtei Sing Syiemïong kum u Syiem ka Hima Langrin.
Haba kren sha ki lad pathai khubor u Bah Faindness Syiemïong u la ong ba ka jingdawa ki khun ki hajar ka Hima Langrin ban weng noh ïa u tei u Syiem kadei namar ba ki la duh ka jingshaniah ba un bteng kum u Syiem ne nongpynïaid ka Hima.
“Ngi kwah ba ka Hima kan ïaid beit ïaid ryntih bad ban ïada ïa ka hok ka jong ngi ym dei tang mynta hynrei ha ka lawei ruh kumjuh,” u la ong.
Kumta u la dawa na u EM ban weng noh ïa u tei u Syiem, khnang ba ka Hima Langrin kan kiew shakhmat bad ba kan lah ban ïada ïa ka riti dustur kiba la buh da u nongthaw, ym tang mynta hynrei naduh kulong kumah.
U Bah Faindness u la ong ruh ba ki khun ki hajar ka Hima kim don shuh ka jingshaniah bad kim kwah shuh hi ruh ba u Nongtei Sing Syiemïong un bat ïa ka khet kum u Syiem.
Haba kylli, u Bah Faindness u la ïathuh ba naduh u snem 2023-2025 kim don shuh ïa u Syiem bapura, namar ba ïa u Nongtei la dep ban sospon naduh u snem 2023 bad ki don tang ïa u Acting Syiem, kata u Bah Brilian Henry Syiemïong, hynrei ki kwah ban ïoh noh da u Syiem bapura.
Nalor kata, u la kyrpad ïa u EM ban buh noh da ka ilekshon, khnang ba kin ïoh noh ïa u Syiem bapura jong ka Hima.
U la ong ruh ba u Nongtei Sing Syiemïong uba ka Hima ka la dep ban sospon naduh u snem 2023 u la leh donbor palat, “Kumta ngi buh ka jingdawa, ba dei ban weng noh mardor ïa u kum ka jingmon hi jong ngi ki paidbah ka Hima Langrin,” la bynrap u Bah Faindness.
“Ngi leh ïa kane da ka jingshaniah ba phin sngap ïa ka jingud jingïam jong ngi bad khnang ba ngin ïoh ïa uta u Syiem bad u nongsynshar ban peit bad khmih ïa ka hok ka jong ngi ki paidbah”, la ong u Bah Faindness.
