Shillong, Risaw 16
Ka kynhun ki kynthei ïalehkai U-17 ka India ka dangsah sha kawei ka jingïakhun lane tang shi point na ka bynta ban long ka kynhun kaba nyngkong eh ban ïoh jaka sha ka AFC U-17 Women’s Asian Cup.
Kane ka kynhun kan ïakynduh pyrshah ïa ka Uzbekistan ha ka jingïalehkai kaba khatduh ha ka Group-G ha ka sngi Thohdieng ha Dolen Omurzakov Stadium kaba ha Bishkek ha ka por 6:30 janmiet bad ka donkam ban pyllait ïalade na ka jingshah rem khnang ban pynthikna ban ïoh rung sha ka AFC U-17 Women’s Asian Cup China 2026.
Kaba kham sngewtyn -nad ba hapoh kane ka kynhun ki la don ar ngut ki ‘thei ïalehkai ka Jylla Meghalaya, kata ka Bonifilia Shullai bad ka Alisha Lyngdoh.
“Kane ka jingïalehkai ka dei kaba ngi la pyn-khreh bad trei shitom baroh kine ki bnai”, la ong ka kapten ka Julan Nong-maithem, kaba la thep ha ka minit kaba 90 ban lam lynti ïa ka India ban jop da 2-1 kol ïa ka Kyrgyz Republic ha ka jingïa-lehkai kaba nyngkong ha ka lah sngi U Blei.
“Ka long ka jingïa-khun kaba eh ha kaba sdang pyrshah ïa ka Kyrgyz Republic, hynrei ngi la sngewkmen ban ïoh ïa ka jingjop ha kaba kut. Kane ka long ka kabu kaba biang eh na ka bynta jong ngi khamtam eh ha ka jingïalehkai kaba khatduh,” bynrap biang ka Julan.
Kumba ju long, katei ka ‘thei ïalehkai kaba dang 14 snem ka rta ka la ai burom sha u kpa jong ka uba la khlad noh ha u snem ba la dep. “Nga tip ba u peit na bneng,” la ong ka Julan kaba la pynpaw ka jingsngewsih hadien ba la kut ka jingïalehkai.
Ka Kyrgyz Republic ka la lah ban kyntiew biang bad pynliem ïa ka Uzbekistan da 2-1 kol ha ka jingïakhun kaba ar ha ka sngi Balang. Kane ka mut ba ka India ka danglamkhmat ha kane ka group napdeng ki lai tylli ki kynhun namar ka jinglah jong ka ban ïalehkai bha pyrshah ïa ka Uzbekistan, bad ka jingïoh point pyrshah ïa ka Uzbekistan kan pynlong ïa ka India ban ïoh rung sha China ha u snem ban wan.
Na ka liang u coach u Joakim Alexandersson u la pynpaw ka jingsngew-sih halor ka jingïalehkai kaba nyngkong, wat hapdeng ka jingjop, hynrei u la pynthikna ba u don ka jingshaniah ha kane ka kynhun.
“Ngim shym la lah ban ïalehkai kumjuh ha ka rukom kaba ngi kwah. Ngi la ïalehkai ha ki bynta jong ka jingpynkhreh jong ngi lyngba kiba bun ki bynta jong ka jingïalehkai. Hynrei ha ka kylla miet, ngi la pyndonkam ban ïoh ïa ki lai point,” la ong utei u coach uba na Sweden.
“Ngin hiar sha madan ban khur ïa ka jingjop bad kam don jingmut eiei ban shu pynïakhaid namar ka buh ïa ngi ha ka jingeh. Te kumta ngin pyrshang ban ïalehkai bha ha la ka jong ka rukom ïalehkai,” la pynthikna utei u coach.
