Shillong, Risaw 16
Ka India kan pynkhreh ban pynlong ïa ka Commonwealth Games ha u snem 2030 kaba dei ka sien kaba ar ha ki 20 snem ba ïa kane ka jingïalehkai yn pynlong ha kane ka ri kaba bun briew tam ha ka pyrthei.
Ïa kane ka lympung yn pynlong ha ka nongbah kaba ha Ahmedabad hadien ba la rai ha ka jingïalang jong ka Executive Board jong ka Commonwealth Sport kaba la long ha ka sngi Balang.
Ka Ahmedabad ka lah ban pynlong ha Narendra Modi Stadium, kaba heh tam ha ka pyrthei kaba lah ban ngiam haduh 132,000 ngut ki paidbah bad ka la pynlong ruh ïa ka jingïalehkai phainal jong ka Cricket World Cup ha u snem 2023.
Kane ka nongbah ka don palat san million ngut ki briew, bad la ai jingmut wat ïa ka kum ka nongbah kaba lah ban ïaleh ban pynlong ïa ka Olympic ha ka lawei ka ban wan.
“Ngi ïohi ïa ka Commonwealth Games 2030 kum ka lad ka ban pynshlur bad ai mynsiem ïa ki samla jong ngi, ban pynkhlaiñ ïa ka jingïatreilang bad ki ri ka pyrthei bad ban noh synñiang sha ka lawei kaba ïasam lang ha kylleng ki ri ha ka Commonwealth,” la pynpaw ka Dr. PT Usha, President ka Commonwealth Games Association India.
Ïa kane ka lympung la pynlong ha ka sien kaba nyngkong eh ha India ha u snem 2010 ha kaba ka Delhi ka la ïoh ban pynlong.
Ka dei ka sien kaba ar ba ka Abuja ka la duh ban pynlong ïa ka Commonwealth, namar ba ka la shah ïeh beiñ na ka bynta ka jingïalehkai jong u snem 2014 ha kaba la ïoh ban pynlong ha Glasgow.
Kane ka mut ba ka Africa ka la hap ban ïai ap na ka bynta ban ïoh ban pynlong ha ka sien kaba nyngkong eh ïa katei ka lympung.
Katei ka lympung ka ban long ha u 2030 kan long ruh ka jingrakhe ïa ka jingdap shispah snem naduh ba la pynlong nyngkong eh ha Hamilton, Canada ha u snem 1930.
