U Nongsaiñ Hima, 1969
Hadien bun bun snem ka jingjied shah bad ïai bniah minot ki riewstad ha ka liang ka jingkoit jingkhiah, arngut ki riewstad ka America ha kine ki khyndiat sngi ba la lah, ki la lap ïa ka buit, kumno ban ker lynnong ïa ki khñiang thaw jingpang cancer ha ka met jong u briew. Ha kajuh ka por, kawei ka kynhun ki doktor jong ka Japan, ki la pynbna ba ki la lap ïa ka dawai kaba la ong ba ka lah ban pynkoit ïa ka jingpang cancer.
ïa ka jingkoit jingkhiah jong ka met jong u briew la ju phikir naduh ki por mynbarim – mynbajah bad suki pa suki, u briew u la lah ban ïaleh pyrshah ïa ki jingpang kiba shyrkhei. Hynrei ka cancer ka la long ka jingpang kaba u briew um lah ban sngewthuh bad shemphang, tad haduh kine ki sngi mynta kumne. Kawei ka daw ha ka jingïaid stet ka saïan ha ka liang ka jingkoit jingkhiah jong ka met u briew ka long naduh ba u briew u la sdang ban kiew shatei sha haw haw.
Ha kane ka liang, shuwa ban phah ïa u briew sha haw haw, la dei ban tip shuwa thik pa thik ïa ka jinglong ka met jong u bad ïa ka jingkoit jingkhiah. Ka jingim jong u briew hapoh ka lieng haw haw ka ktah shibun ïa ka jingkoit jingkhiah jong u, bad kumta la donkam ban tih jylliew ïa baroh ki jingtip naduh iba rit tam ïa ka jingtreikam jong ka met u briew bad ka jinglong jong u. ïa ka bam na ka bynta ki nongher haw haw la hap pynkhreh kyrpang shibun, khnang ba kan kynthup ïa ki jingbam kiban aibor bad tei ïa ka met jong u, wat lada u briew u shu shong ha kajuh ka jaka khlem da khih shane shatai. Kumta la shem ba kum ïa kane ka bam ba la pynkhreh ïa ki nongher haw haw lah ruh ban pyndonkam ha kito kiba thiah pang slem bha.
Ha kane ka jingleit ba khadduh jong u briew sha u Bnai, u Conrad u la ud ba u sngew baïong khlieh bad ba ka khmut jong u ka set hynrei u tang shu mih na ka lieng bad iuh kjat ha u Bnai, u ïathuh ba kata ka jingset khmut kam don shuh. Hapoh jong ka lieng haw haw ka don ruh kawei ka kot – pita (telemetry) kaba thew ïa ka jinglong jong ka met u briew naduh ka jingtied u klong snam haduh ka jingkhih jong ki thied. Kumta da ka jingïai tih ïa ki jingtip kiba bniah, ka don ka lad ba ïa bun ki jingpang jong u briew ha pyrthei, lah ban pynkoit kham kloi, da kaba buh ïa u briew ha ki kamra, ba suda bad bym don jingkhia kumba long ha haw haw.
Don ki jingpang kiba u briew u dang duna shibun ki jingtip, kum ki jingpang na ka jingkyndit kynsan, ne na ka jingsah marwei ha haw haw, na ka jingshah ïeh marwei bun bun sngi jong kito kiba jah ruma sha ki khlaw ki btap, kum kito kiba jah ha duriaw ne kiba shah set marwei ha ki byndi. Kane ka jinglong marwei u briew na kiei kiei ka long kaba ma shibun, bad ïa kane ka saïan jong ka jingkoit jingkhiah ka ïaleh ban wad bad tih ïa ki daw jong ki jingpang kiba mih nangne bad ruh ïa ki jingpynkoit bad jingïada na kum ki jingpang.
Kumta ha kane ka juk haw haw, la pynmyntoi shibun ba u briew un lah ban nang shemphang bad shem lad ban kham tip bniah shuh shuh ïa bun ki jaid jingpang, ïa ki jinglong ba bniah jong ka met u briew, bad ïa ki dawai bad jingïada kiba u briew un lah ban pynmih ban ïakynduh ia kine ki jingeh. Ki ban iohnong na kine baroh ki long ki paid bynriew jong ka pyrthei salonsar, ha kaba u briew u don mynta ka jingkyrmen ban ioh ïa ka jingkoit jingkhiah ba kham janai.
