Shillong, Risaw 16
Ka Khun Hynñiewtrep National Awakening Movement (KHNAM) ka la pynpaw ka jingsngewkhia halor ka jingbym ïoh lad jong ki nongrep ka shnong Lapangap ha West Jaiñtia Hills District, ban leit ot kba watla mynta ka kynti ka la dei ka aiom ot kba.
Ha ka kyrwoh ba la phah da u Working President ka KHNAM, u Bah Thomas Passah u la ong ba ki nongrep na ka shnong Lapangap ki la pyrshang la bunsien ban leit ot kba hynrei ki jaidbynriew Karbi na ka por sha ka por ki la khanglad bad pynwit ïa ki da kaba siat da ki jri.
“Hynrei ngi sngewlyngngoh ban ïoh sngew na u Myntri Rangbah ha kaba u la ong ïa ki nongrep katei ka thaiñ ban kiar na kaba ot ïa u kba namar ka kham kordor ka jingim, ngi ngeit ba u Myntri Rangbah u sngewthuh ba lada um ïoh khaw ban bam ruh kan don hi ka jingma ïa ka jingim,” la ong u Bah Thomas.
U Bah Thomas u la ong ruh ba ka KHNAM kam lah ban pdiang ïa ka jingkyntait jong ka Sorkar Jylla ban ïakren bad ka Sorkar Assam ban pynïoh ki lad ki lynti ïa ki nongrep ban leit ot kba.
U la ong ba lada ka Sorkar Jylla kam lah ban ai jingïada ïa ki nongrep ka shnong Lapangap ban leit ot kba, ka dei ban siew bai lutksan (Compensation) sha ki nongrep bad ki paidbah nongshong shnong.
“Hadien ka jingkulmar kaba la jia ha ka thaiñ Lapangap ha kine ki khyndiat sngi, ngi la ïoh ki khubor ba ka Sorkar Assam ka la pynbiang bha ki pulit ha ryngkat ki tiar kiba biang naduh ki LMG bad ki Special Forces kiba la don sha katei ka jaka. Kaba sngewsih pat ba na ka liang ka Sorkar Meghalaya ka khlem don eiei kum kata ka jingpynkhreh ban ai jingshngaiñ bad jingïada ïa la ki paidbah nongshong shnong ka Jylla” u la ong.
