Shillong, Risaw 16
Ka lympung ïalehkai Inter-Regional Football Tourna-ment 2025 kaba san sngi ba la pynlong da ka POWERGRID North Eastern Region (NER) ka la poi sha kaba kut ha ka sngi Balang (15 tarik) ha madan ïalehkai phutbol jong ka SAI ha Nehu, Shillong.
Ïa ki jingïakhun semi final la pynlong ha ka sngi Ba-ar ha kaba ka Southern Region (SR) II ka la pynliem noh ïa ka Western Region (WR) I bad ka NER ka la jop ïa ka CC na ka bynta ban jam sha ka final.
Hynrei ha katei ka jingïakhun final, ka NER ka la pynliem noh ïa ka SR II na ka bynta ban rah ïa ka nam lahduh, katba ka SR II ka la wan ba-ar bad ka CC ka lawan balai.
U Sh.Sumit Sutradhar jong ka NER u la ïohpdiang ïa ka nam Player of the Tournament bad ka Best Fair Play Team ka leit sha ka WR-II. U Sh.Nikhil Kumar jong ka CC u la ïoh ïa ka nam Top Scorer ha kane ka lympung.
Ïa ki khusnam la sam da u Sh. Rajesh Gupta, Executive Director (NERTS) kum u kongsan bad u Sh. K.B. Jagtap Member Secretary (NERPC) kum u symbud kongsan.
