Shillong, Risaw 16
U Myntri Rangbah ka Jylla u Conrad K Sangma ha ka sngi Palei u la lum ïa ka jingïalang bad ki nongïalam na ki kynhun bapher bapher ryngkat ki bor pynïaid district, ki pulit bad kiwei na ka bynta ban ïatai ïathir sani halor ki jingjyllei jong ki kam shah thombor shah lehbeiñ ïa ki khunlung khynnah bad kynthei ha ka Jylla.
Ha kane ka jingïalang la don lang u Myntri ka tnat ka koit ka khiah u Bah Wailadmiki Shylla, u Nongaibuit ka tnat Social Welfare u Bah Paul Lyngdoh, ka Director General of Police (DGP) ka Kong Idashisha Nongrang, u Chief Secretary u Dr Shakil Ahmmed, ka Chairperson jong ka Meghalaya State Commission for Women (MSCW) lem bad ki ophisar na ki tnat bapher bapher ka Sorkar. Nalor kitei, la ïadonlang ruh ki nongïalam shnong na ki shnong bapher bapher, ki nongïalam na ki kynhun ñiam bapher-bapher, kumjuh ki nongpynïaid jong ki jaka pule.
Haba kren sha ki nongthoh khubor hadien ba la wai ka jingïalang, u Conrad u la ong, ba ka jingïalang ka la long kaba kit jingmut shibun namar shibun ki jingai jingmut u la ïoh pdiang na ki nongïalam bapher bapher halor ki lad ki lynti ban shim na ka bynta ban ai ki jingïada bad wanrah jingshngaiñ ha ka leit ka wan.
U Conrad u la ong, ki jingthombor bad jingleh beiñ pyrshah ïa ki khyllung khynnah bad kynthei ki long ki bym lah ban pdiang bad kiba pynkheiñ ruh ïa ka hok longbriew manbriew.
Haba pdiang sngewbha ïa ki nongwan ïashim bynta sha kane ka jingïalang kaba donkam bha bad ban ai ruh ïa ki jingai jingmut kiba donkam, u Myntri Rangbah u la ong, “Ka Sorkar bad ka imlang sahlang ki dei ban ïatreilang ryngkat ryngkat kumno ban ai ka jingïada ïa ki kynthei bad khyllung khynnah bad ban pynthikna ïa ka jingshngaiñ bad ka jingim kaba kmen.
Shuh shuh u Myntri Rangbah u la ong, kum ka Sorkar ka kwah ban shimkhia ïa kum kine ki jingjia ba sngewsih bad ka kwah ban pynthikna ba kum kine ki jingjia kin duna bad ba kumno ki rangbah shnong, ki sengtreimon sngewbha bad ka imlang sahlang baroh kawei kin ai ka jingïatrei ryngkat bad ka Sorkar khnang ban lah ban jop bad ban poi sha ka thong.
U la pyntip ba ka Sorkar ka la shim ruh katto katne ki jingai jingmut ba kynthup ban buh shibun ki jaka ban ai jinghikai bad ban buh ki riew shemphang ban ïarap ïa ki samla, ka jingpyntip bad jingpynsngew paidbah haba ïadei ki mat ban pynbha ïa ki samla bad ki khynnah.
Na ka liang jong u Myntri Rangbah u la pynbna ïa ar bynta ki plan kata ban pynkhlaiñ ïa ka jingshngaiñ ha ka Jylla Meghalaya lyngba ka jingbuh ïa ki kor CCTV Camera bad ka jingbuh ïa ki ‘Local Command Centre’ kiba yn peit bad pynïaid da ki khlieh nongsynshar bad ki Dorbar Shnong.
Ka Shillong Municipal Board ka la ithuh haduh 47 tylli ki jaka ban pyndait ïa ki kor CCTV, kaba ha kawei ka shnong kan don lai haduh san tylli ki jaka ban buh kor CCTV bad ha ka bynta kaba ar, ïa ki jaka ban pynïaid ïa ki kor CCTV yn sa pynïasoh bad ka Integrated Command and Control Centre (ICCC) kaba don ha New Shillong.
U Conrad u la ong, “Ngin sdang na ki jaka sor kum ka Shillong, Tura bad Jowai bad sha ki nongbah jong ki District bad nangta sa ha ki Sub-Division bad suki suki ngi kyrmen ba ngin lah ban buh ha kiba bun ki jaka”.
U Myntri Rangbah u la ong, “Kumba ngi la ïaid shakhmat hadien ka jingïakren bad ki skul, ki shnong, ngi sngew donkam ban shimkhia bad ngi sngewkmen ban ïaid shakhmat ban leh ïa kane namar nga pyrkhat ba kane kan ai ïa ka jingbha bad ka jingshngaiñ na ka bynta jong ki paidbah.”
