Shillong, Risaw 16
Ka Sorkar Jylla lyngba u Myntri Rangbah, u Conrad K. Sangma ka la pynkhreh da ka jingsiew ba thymmai (Pay Stucture) na ka bynta ki nonghikai SSA.
Kane ka rai jong ka Sorkar kadei hadien ba la pynlong ïa ka jingïalang ha ka 16 tarik Risaw 2025 bad ki nonghikai SSA, ban ïakren halor ki mat jingdawa jong ki, kiba la neh mynta la bun-bun snem.
Ha kane ka jingïalang nalor u Myntri Rangbah ka Jylla, la ïadonlang ruh u Bah Lahkmen Rymbui, Myntri ba dei khmih ïa ka tnad pule puthi, ki nonghikai ba kynthup na ka Meghalaya SSA School Association (MSSASA), ki nonghikai ka Meghalaya 4th Teachers Association (M4thTA) bad kiwei-kiwei.
Haba kren sha ki lad pathai khubor, u Bah Aristotle Rymbai, President ka Meghalaya SSA School Association (MSSASA), u la ong ba ka jingïalang ka long kaba seisoh ha kaba u Myntri Rangbah ka Jylla, u la kular ba ka Sorkar ka ïada ïa ka kam ki nonghikai SSA bad kumjuh ruh haba ïadei bad ka jingdawa kyntiew tulop jong ki.
U Bah Aristotle u la ong, “Kumba phi tip ba ka jingbei pisa na ka bynta ki nonghikai SSA kan sa kut noh ha u snem 2026, ngi kmen ba u Myntri Rangbah u la kular ban ïada ïa ka kam nonghikai SSA.”
U la ong ki don haduh 3,332 tylli ki skul SSA hapoh Meghalaya kiba la rai ban aiti ban pynïaid noh ha ka Sorkar Jylla.
“Napdeng kine, 3,034 kidei ki skul ba pynïaid da ki shnong lane ki Community School bad 298 tylli kidei ki skul shimet kiba ïoh jingïarap na ka Sorkar (Private Aided School),” u la bynrap.
U Bah Aristotle u la ïathuh ruh ba u Myntri Rangbah u la kular ruh ban pyntreikam noh da ka jingsiew ba thymmai (Pay Structure) na ka bynta baroh ki nonghikai SSA bad ki 4th teachers, kaba long katkum ka jingdawa jong ki nonghikai baroh shi katta na bynta ka jingpynkiew ïa ka tulop.
“Kumba ong, ngi hun ïa kane ka jingïalang mynta ka sngi bad ka jingïakren kaba bniah ngin sa pyntip paidbah ynda ngi la lah biang ban pynlong ïa ka jingïalang jong ki nonghikai ka ban long shen” la ong u Bah Aristotle.
Na ka liang u Bah Fredrick Lyngdoh pat u nongïalam ka Meghalaya 4th Teachers Association, u la ai khublei ïa ka Sorkar halor kine ki sienjam ba ka la shim.
