Jowai, Risaw 16
U Myntri ka tnat Pule Puthi ka Sorkar Jylla bad MLA ka Amlarem, Bah Lahkmen Rymbui ha ka 15 tarik Risaw, ula plie ïa ka ïing skul ba la shna thymmai jong ka Jarain Government Lower Primary School, ka skul kaba la rim tam ba la seng naduh u snem 1910.
Ïa kane ka ïingskul thymmai la tei hapoh ka Special Rural Works Program (SRWP) 2023-24 ha ka dor 9 lak tyngka bad SCA (BADP) 2019-2020 ha ka dor 20 lak tyngka.
U Bah Lahkmen Rymbui ha ka jingkren ula pynkynmaw ïa ka pateng ba slem jong ka skul bad pynskhem biang ïa ka jingaiti lut jong u ban kyntiew ïaka pule puthi ha ki thaiñ nongkyndong.
Ban nang pynbha pynmiat shuh-shuh ïa kane ka skul, u Bah Rymbui ula pynbna ban ai jingïarap kaba 8-14 lak na ka bynta ban shna ïa ka kamra shet ja bad jaka bam hapoh ka skhim PM-POSHAN (Mid-Day Meal).
Haba ïadei bad ka jingbha jingmiat ki skul bad surok hapoh ka konstitwensi, u Myntri ula pyntip ba la mang 10 lak tyngka na ka bynta ka skul Seng Pynryumlang Ki Hyntha bad 2 klur tyngka na ka bynta ban pynbha ïaki surok ha Jarain bad ki shnong ba marjan hapoh ka BADP.
U Myntri ula ïathuh ruh ïa ki kam ba dang ïaid shakhmat ban pyndep ïa ka Sub-Divisional Hospital ha Jarain bad ba u thmu ban khot sngewbha da u Myntri Rangbah ka Jylla ha ka por ba rakhe ïa ka Jubili Ksiar jong ka Amlarem Sub-Division ha ka 12 tarik Nohprah, 2025 ban plie bad bishar bniah ïa ki kam pynroi.
Haba kren halor ka jingkitkhlieh hapoh ka imlang sahlang, u Bah Rymbui ula kyntu ïa ki kmie ki kpa, ki shipai ïada shnong ne VDP ba kin long kiba husiar ha kaba ïada ïa ki khynnah.
Haba kren sha baroh ki khynnah bad samla pule, u Myntri ula pynshlur ïa ki ban pule minot, ban shaniah halade bad ban ym shaniah tang ha ki kam Sorkar.
Ula ai jingïaroh ïa ka Kitchen Garden jong ka skul, kaba dang shen ka la pynmih 20 kilo ki presbin, da kaba ai jingmut ba ki khynnah skul ki dei ban die ïa ki mar rep jong ki kum ka jinghikai ha ka kam seng kam seng jam.
Nalor u Myntri, ha kane ka sngi la donlang ruh u MDC ka War Central, Bah Jamshaphrang Pohtam, ka Kong Deibor Patrecia Lytan (I/C SDSEO, Amlarem Sub-Division), ki nongïalam bad dkhot nongkitkam shnong, ki nonghikai, ki kmie ki kpa bad ki khynnah skul.
Ïa ka jingïalang la pynïaid da u Chairman SMC, Ma Manner Myrmen bad la ïoh ka jingkren lyngkot na u Waheh Shnong Bah Shngainlang Suting, na ka Kong Lahba Pamthied (Retd. Head Teacher), kumjuh na ka Kong Florimai Mukhim (Head Teacher), bad la pynphuh pynphieng ïa ka jingïalang da ki jingrwai jingshad na ki khynnah kane ka skul.
