Shillong, Risaw 16
Ki runar bym lah ban ithuh ki la ïoh ban tuh bad rah ei ïa ki ar tylli ki High Tension Conductor kiba shongdor da ki lak tyngka.
Katkum ka khubor na ki pulit la ong ba u Bishu M Marak, uba dei u Resident Engineer jong ka Sub-Station, MEPDTL, Nongalbibra ha South Garo Hills u la ai ka jingujor ba ha ka 14 tarik mynta u bnai, ha ka por kumba 7 baje dang step, ha ka por ba ka la don ka jingjurip kaba ju pynlong manla ka por ïa ki tower hajan jong ka Nengkra A’we ha East Garo Hills da u Annual Maintenance Contractor, la lap ba ki tiar ba shongdor da ki lak tyngka ki la jah.
Katkum ka khubor na ki pulit la ong ba ar tylli ki High Tension Conductors (HTLC) kiba shongdor kumba T.6.96 lak la lap ba ki la shah tuh na ka jaka ba don u tower bad kumjuh ruh haduh saw tylli ki tiar pyndait kiba shongdor kumba T.2,32,960/- la lap ba ki la shah pynjulor.
Ha kawei pat ka khubor shah tuh, la ong ba u Bah Dondor War u la ai ka jingujor ba ha ka 30 tarik u Nailur, 2025, ki runar bym lah ban ithuh, ki la tuh ïa ki cable jong ka AJB Power bad ar tylli ki Remote Radio Units kiba shongdor kumba T.3,35,870/- na kawei ka mobile tower kaba don ha Mawdulop, Mawkynrew ha East Khasi Hills.
