Shillong, Risaw 16
Ka Rangdajied United FC ka la shim por tang saw minit ban pynliem ïa ka Mylliem SC da 4-1 kol ha ka lympung ïalehkai Shillong Premier League kaba la long ha ka sngi Palei ha SSA Stadium kaba ha First Ground, Polo.
Ïa kine ki saw tylli ki kol ka Rangdajied la thep lyngba u Micky Marweiñ (48), Dibormi Kassar (49 & 50) bad u RT Hanson Pdang (52). Katba ka Mylliem ka la lah ban pyllait na ka jingshah brut ha kaba ka la lah ban pynphai kylla shi kol lyngba ka penalty ba la shut da u Alem Khongwir ha ka minit kaba 68.
Kumta da kane ka jingjop, ka Rangdajied United FC ka la jam sha ka kyrdan kaba san bad sah sa kawei ka jingïalehkai kaba khatduh bad ka la khur 12 point na ki phra sien ïakhun, katba ka Mylliem SC ka hiar sha ka kyrdan kaba hynñiew namar ba ka la lah ba kan khur tang 11 point.
Ka jingïakhun ha ka kylla step hi ka long ba ka rukom ïalehkai ki ar kynhun ka long ba kin sdang shwa da ka jingïapyrshang, ha kaba la mih paw ki kabu ksiar ban ïa pynkhih ïa ka jar, hynrei kim shym la lah ban pynurlong.
Dei tad hadien ba la bteng ïa ka jingïakhun jong ka kylla miet, ba ka Rangdajied ka la ïakhun tyngeh ha ka rukom ïalehkai da kaba ñion tyngeh kat haduh ba ka la ïoh ban thep haduh saw kol.
Ha ka sngi Thohdieng ka jingïalehkai kan long hapdeng ka Mawlai SC pyrshah ïa ka Nongrim Hills ha ka por 4:30 nohphai sngi.
