Shillong, Risaw 16
Ka Nongkrem Government Upper Primary School ka la pynhap pyrda noh ïa ka jingrakhe dap 75 snem jong ka jingïaid lynti jong ka, ne ka Platinum Jubilee kaba la long ha ka 16 tarik mynta u bnai.
Ha kane ka sngi u Myntri Rangbah ka Jylla u Conrad K Sangma u la long kum u Kongsan uba la pyllait ruh ïa ka thup sah jingkynmaw jong ka jingdap 75 snem ka skul.
Haba ai jingkren u Conrad u la ong ba ka Sorkar ka la mang 15% na ka pla tyngka ka Sorkar na ka bynta ban siew tulop ïa ki nonghikai. U la ong ba ka Sorkar ka pynlut haduh T.3654 klur tang na ka bynta ban kyntiew ïa ka pule puthi ha ka Jylla bad na kane kumba T.1967 klur la siew tulop ïa ki nonghikai.
U la ïathuh ba ka Sorkar ka pynlut T.684 klur na ka bynta ban siew tulop ïa ki nonghikai skul Sorkar bad T.917 klur na ka bynta ki nonghikai deficit bad adhoc.
Shuh shuh u la ong ruh ba ym don kano-kano ka Sorkar ha ka thaiñ shatei lam-mihngi (North East) ban siew tulop ïa ki skul shimet hynrei tang ka Sorkar Meghalaya ka lah ban leh ïa kane.
U la ong ka por ka dei kaba kordor bad shisien ba la leit kam lah ban wanphai, namar lada u slem shi kynta ban poi ha ka jingïalang, kiwei kiba ap ruh kin sepei lang ka por.
Ka Principal jong kane ka skul ka la ai ka dorkhas sha u Myntri Rangbah ban kyrpad ban kyntiew noh ïa ka skul na Upper sha ka Secondary bad halor kane, u Conrad u la ong ba un sa bishar bha bad ki ophisar ka tnat ka pule puthi.
Ha kane ka sngi la pynkup burom ïa ki nonghikai ba la shongthait jong kane ka skul, la pynkup burom ruh ïa ki khynnah skul barim jong ka skul kiba la kynjoh sha ka 85 snem shaneng.
La pynshongshit ha kane ka sngi da ka jingrwai tynrai na ka kynhun ba jop ïa ka Inter School Competition, nangta ka jingrwai ba kyrpang na ki nonghikai bad ki nongtrei katei ka skul.
Ha kane ka sngi la ïadon lang u MLA barim ka Nongkrem, Bah Lambor Malngiang, u Syiem ka Hima Khyriem Paiem Dr. Balajied Sing Syiem, ki nonghikai, ki ophisar ka tnat pule puthi bad kiwei-kiwei.
