Wasghington, Risaw:
U President ka US, u Donald Trump ha ka Sngi Ba-ar, u la iathuh ba ka America, ka la ther sa ia kawei ka lieng rit, kaba la ong ba ka kit ia u droks, ha ki um ki wah jong ka Venezuela, ha kaba 6 ngut ki la iap na katei ka jingleit ther jong ka US.
Kito kiba iap ha katei ka jingthombor, ki don ha katei ka jhad bad ym shym la don ki shipai jong ka U.S., kiba la mynsaw ne ngat lang ha katei ka jingjia, la pynbna u President ka seng Republican, ha ki rynsan Social Media. Ka dei ka jingshah thombor kaba san ha katei ka duriaw Caribbean namar ba ka sorkar jong u Trump ka la pynskhem ia ka nongrim ban kput ïa ki nongkhaïi droks kiba la shah ñiew kum ki nongleh be-aiñ kiba dei ban shah pynduh- pymdam da ka bor shipai.
U Secretary jong ka tnat iada ri, u Pete Hegseth, u la hukum ia katei ka jingiakhih, ha ka step jong ka sngi thohdieng, ong U Trump, uba la pynmih ia ka video jong katei, kumba u ju leh ha ki por ba la dep. Hadien kata, u Hegseth u la pynsaphriang pat ïa katei ka video ha ka jingthoh hapoh ka rynsan X.
Ka video ka bym don rong ‘Black & White’, kaba la pyni ia kawei ka lieng rit ka bym dih jingkhih bad kaba per sah halor jong katei ka um. Ha kaba tang hadien khyndiat sekhon, pat, la ther ia ka da u bom na jrong bad ka la bthei syndon hangta. Nangta la iohi ia ka lieng ba ka la per halor um ha ryngkat ka ding kaba la klang halor jongka.
