Jowai, Risaw 17
Ka Ïingkashari Special Judge (POCSO), Jowai, West Jaiñtia Hills District ha ka 17 tarik Risaw, ka la rai pynrem ïa u Gentlyness Pasleiñ hapoh ka kyndon 4 jong ka POCSO Act, 2012 da kaba set phatok 10 snem namar ka jingdonkti ha kaba leh be-i-jot ïa kawei ka khynnah rit ha ka jingjia kaba la jia ha u snem 2016.
Kane ka jingjia ka dei kaba la mih lyngba ka jingmudui ejahar da ka kmie jong kane ka lanot ha ka 11 tarik Kyllalyngkot 2016, ha kaba ka la kynnoh ïa une u briew uba kyrteng u Gentlyness Pasleiñ ba u la leh be-i-jot ïa ka khun jong ka kaba dang 7 snem rta hapoh ka ïingsah jong ki.
Halor kane ka jingjia la pynngat mukotduma hapoh Jowai Police Station No. 12(01)16 u/s 4 POCSO Act bad la tohkit bad mudui da ka WPSI R.M. Suchiang.
Hadien ka jingtian bishar, ka Ïingkashari ka la rai pynrem ïa u Gentlyness Pasleiñ da kaba set phatok 10 snem ha ryngkat ka kuna kaba T.10,000 bad lada um siew ïa kane ka kuna un hap ban shong tam ha phatok sa hynriew bnai kynthih.
