Shillong, Risaw 17
Ka Meghalaya ka la khur ïa ka jingjop ha ka U-19 Vinoo Mankad Trophy, hadien ba ka la jop ïa ka Mizoram da 7 ron ha ka sngi Thohdieng ha Chandigarh.
Kane ka jingjop, ka jia ryngkhat ba ar sngi mynshwa kane ka juh hi ka kynhun ka la lah ban pynliem ïa ka Nagaland. U Ashish Kumar Lohar, u la lah ban paw ïa ka jingtbit, hadien ba u la lah ban tied 32 ron na ki 30 bol, kaba la pynlong ïa ka Meghalaya ba kan kamai 127 ron na ki 49.3 over.
Haba la wan pat ban kawang bol, ki rangïaleh-kai ka Meghalaya ba la lamkhmat biang da u Ashish, hadien ba u la ïoh ban khur 8 wiket na ka bynta 29 ron na ki 9 over, bad ïoh pynhap lut baroh ki wiket ïa ka Mizoram hadien ba ki la lah ban kamai 120 ron na ki 27.3 over.
Nalor u Ashish, u Namewanhi Pakynteiñ u la lah lem ban noh synñiang ha ka jingkamai ron ïa ka Meghalaya hadien ba u la lah ban tied 23 ron na ki 46 bol, katba na ka liang ki nongkawang bol ka Mizoram u Malsawmmuanzela u la khur 4 wiket na ka bynta 21 ron na ki 10 over.
Kumban shu pynkynmaw ba ka lynti ïaid ka Meghalaya ha kane ka lympung mynta ka samoi ka la sdang shwa ban mad ïa ki artylli ki jingshah rem na ki jingïakhun kiba shakhmat bad ba ka la lah pat ba kan pynkut da ki lai tylli ki nam jop, kaba lehse kan long ka resol hiar ïakhun kaba pynkmen, pynban ha ka liang jong ka jingtied, kadei ka bynta, kaba kum ka kynhun kan dang donkam ban kham trei shitom ban pynjanai shuh shuh ïalade katba kane ka lympung kan dangjam shakhmat.
