Shillong, Risaw 17
U MLA ka West Shillong Konstitwensi u Bah Paul Lyngdoh ha ka 17 Tarik u Risaw 2025, u la leit ban jurip ïa ka surok naduh na Stand Jeep, Ïewduh ter-ter shaduh sha Garikhana, ban pyntikna ba baroh ki projek yn pyndep noh, ba kynthup naduh ki surok, ki nala um bad ka jingsam um bam um dih.
Kane ka jingleit jurip u Bah Paul ka dei halor ban peit ïa ka jingeh ba ki paidbah ki ïakynduh, khamtam eh ha kaba ïadei bad ka surok, ki nala um bad ki pipe um ba lait kai.
Ha kane ka sngi nalor u Bah Paul Lyngdoh la ïa don lang ruh ka Synjuk ki Shiphew Dorbar Shnong jong ka Shillong West Konstitwensi, u Myntri ka Hima Mylliem, ki briew ka Shillong Municipal Board (SMB), ki briew ka tnad PHE, ki briew ka NHIDCL bad ka tnad PWD.
La sakhi ba ka surok ha shilynter katei ka jaka na Stand Jeep ter-ter shaduh sha Garikhana, ka um ka la shu lait kai ha rud surok khlem da don kano-kano ka jingpynbha, la ka long naduh ki pipe um ba la jot rathai bad kiwei-kiwei de.
Ym tang ki pipe um ba la jot ne ka jinglait kai ka um, hynrei la ïohi ruh ba ka surok ka long kaba la sniew tasam haduh katta-katta, kaba don jingma ïa ki paidbah ba ïaid lyngba katei ka surok.
Haba kren sha ki lad pathai khubor u Bah Paul u la ong ba ka jingjurip ka long halor ki jingeh jong ki paidbah bad khamtam eh na ka bynta ka umbam umdih kaba khuid ba suba.
“Ngi la mynjur ba ïa ki pipe um kiba la rim baroh yn sa pynthymmai noh ban shna da kiwei, khnang ba ka umbam umdih kan nym laitkai” u la ong.
U Bah Paul u la ong ruh ba kine ki kam ban pynbha yn pynlut da ka T.25 klur, kaba la mang ban pynbha ïa ka ïewduh, kaba la dep ban pynbna hi da u Myntri Rangbah u Conrad K Sangma.
“Ngi kyrmen ba kane ka kam kan sdang noh shaid-shaid ban pyntrei pynbha ïa ki pipe um hadien ba la ïoh ïa ki jingdonkam baroh na ka tnad PHE.
Ha kaba ïadei bad ka surok pat u Bah Paul u la ïathuh ba na ka liang u nongpeit ïa ka NHIDCL u la pyntip ba shen yn khot tender ban shna ïa ka surok na Paltan Bazar ïa kaba yn shna da ka CPWD bad na ka surok bah yn shna da ka NHIDCL.
U Bah Paul u la pyntikna ruh ba ïa kane ka kam yn sa pyndep noh hapoh u bnai Nohprah (December) 2025.
