Nongpoh, Risaw 17
Ha ka sienjam kaba thymmai pat ban wanrah ïa ka jingïatreilang kaba ïajan bad ki paidbah, ki pulit ka Ri-Bhoi hapoh ka jingïalam jong u Senior Superintendent of Police, u Vivekanand Singh Rathore lem bad u Additional Superinten-dent of Police, u Bah Orville Massar, hynnin ka miet ki la pynmih madan sa ïa ki dkhot VDP ka shnong Quinine ba kynthup ïa ki longkmie bad khun samla ha ka jingbteng ban talasi ïa ki kali pynkheiñ ain ha ka surokbah National Highway-6 ha Ri Bhoi.
Ha kane ka jingtalasi kaba la pynlong naduh ka por 5 baje janmiet ter-ter haduh ka por 10 baje mynmiet, la ïohi ïa ka jingshim bynta shitrhem jong ki longkmie bad khun samla katei ka shnong Quinine ban talasi ïa ki kali kiba pynkheiñ aiñ ha ryngkat ki bor pulit.
Kumban shu kdew, ka surokbah kaba hap ha ka shnong Quinine, ka dei kawei na ki jaka ba ju jia khah-khah ki jingjia tyngkhuh kali kaba la wanrah ruh ïa ka jingduh noh ïa kiba bun ki mynsiem briew.
Katkum ka tyllong khubor na ki pulit, ka jingtalasi kaba la pynlong hynnin ka miet, kata ym tang ha Quinine hynrei ha kylleng ka Ri-Bhoi District, la ïoh ban daiñ kuna haduh T. 5 lak na ki nongñiah kali kiba pynkheiñ aiñ, kata kynthup naduh kiba ñiah hapdeng ka jingshoh khaw-iang, ka jingpyndait ïa ki bording LED kiba thaba, ka jingñiah khlem laisen bad shibun kiwei-kiwei de ki jingpynkheiñ aiñ.
Ha kane ka janmiet, la sakhi ba wat ki longkmie VDP jong ka shnong Quinine ha ryngkat ki khun samla, ki la ai jinghikai ruh ïa ki nongñiah kali, kumno ban deng ïa ki ‘seatbelt’ bad ban ym ñiah kali haba la buaid naba ka buh ïa ki bad kiwei ki nongleit nongwan ha ka jingma.
U Vivekanand Singh Rathore haba kren sha ki lad pathai khubor ha kane ka miet, u la ïathuh ba ka jingbteng ïa kane ka jingtalasi kali ha kine ki ar-lai taïew kiba la dep, ka dei halor ka jingthmu ban pynduna ïa ka jingjia tyngkhuh kali bad ban pynkhlaiñ ïa ka jingpeitngor na ka liang jong ki paidbah ruh kumjuh.
“Ngi kwah ba ki VDP kin don bynta lang ha ka jingtalasi kali namar ka Ri-Bhoi ka don kumba 650 haduh 700 tylli ki shnong. Ha kawei ka shnong ki don kumba 15 haduh 20 ngut ki dkhot VDP bad kane ka ai ïa ngi kumba haduh 10,000-12,000 ki dkhot ki ban long kum ki khmat bad ki skhor jong ki pulit ha ki shnong ki thaw,” la ong u Rathore.
U la pynshai ruh ba kane ka sienjam kaba la shim kam dei satia tang na ka bynta ka jingtalasi kali, hynrei ban wanrah ruh ïa ka jingpeitngor ban ïada na ki kam sniew ha ka imlang-sahlang.
“Ngi la ïohi ha ki por kiba la dep halor ka jingjah rngai ki heprit, ka jingshah rahbor bad ruh ki kam pynïap. Lada man la ki shnong ki don ïa ki VDP kiba treikam, kin lah ban peitngor bad ai jingtip sha ki bor pulit haba ki ïohi ïa kino-kino ki jingsuba sniew, bad kane kan ïarap shi kat dei ïa ki bor pulit ban leh ïa la ka kamram ha ka por kaba biang,” la ong u Rathore.
Utei u heh pulit ka Ri-Bhoi, u la pyntip ba ka Sorkar Jylla hapoh ka jingïalam jong u Myntri Rangbah, u Myntri kam pohïing, u Chief Secretary lem bad ka DGP, ki dang pynbeit bad pyrkhat sani halor kumno ban ai ïa ki tiar kiba donkam na ka bynta ki VDP lem bad ka jingïarap pisa ban ai mynsiem shuh-shuh ïa ki.
U la ïathuh ruh katkum ki jinglum jingkheiñ na kine ki jingtalasi ha kine ki khyndiat sngi, ki jingjia tyngkhuh kali ki la hiar bha da kaba ong ruh ba ha kine ki ar taïew kiba la dep, ym don satia kino-kino ki jingjia tyngkhuh kali kiba jur, haba ïanujor bad ki bnai kiba la dep.
“Kane ka pyni ba ka jingtrei shitom ka jong ngi ka treikam. Ngin ïai bteng ban pynlong ïa kum kine ki jingtalasi na kawei ka jaka sha kawei pat man la ka por, khamtam ha ki jaka ba jur ki jingjia tyngkhuh kali jong ka surokbah,” la bynrap u Rathore.
U Rathore u la ban jur ruh ba kane ka jingtalasi kali, kam dei satia ban pynshitom ïano-ïano, hynrei ka dei na ka bynta ban ïada ïa ki mynsiem briew, da kaba ai ka jingïaroh kaba kyrpang ïa ki pulit kiba ju don ha surok baroh shi sngi, mynstep haduh da miet, ban pyntikna ïa ka jingshngaiñ jong ki paidbah nongleit-nongwan bad ba ki dei hok ruh ban ïoh ïa ka jingithuh kaba khraw halor ka jingtrei shitom jong ki.
Shuh shuh, utei u heh pulit, u la ai khublei ruh ïa ki dkhot ka VDP jong ka shnong Quinine kiba la shim bynta shitrhem bad ki bor pulit kumba san kynta jong ka jingtalasi kali bad kyntu ruh ïa ki paidbah ba kin ai ïa ki jingai jingmut jong ki ha ki ‘Social Media’ jong ki pulit ka Ri-Bhoi ban pynlong ïa ka distrik bad ka Jylla hi baroh kawei, kaba lait na ki jingsniew baroh bad khamtam eh ba ki khun ki kti ki jong ngi, ki ïoh ban leit skul khlem jingsheptieng bad ba ki nongshong shnong ki ïoh ban leit ban wan ha ka jingshngaiñ bad ka khlem ka jingsyier.
Na ka liang jong ki nongïalam ka VDP na ka shnong Quinine bad kynthup lang ïa ki longkmie bad samla, kiba ai jingkren, ki la ai ka jingïaroh sha u SSP ka Ri-Bhoi halor kane ka sienjam kaba u la shim ban ïadon bynta lang bad ki VDP ha jingtalasi kali ban wanrah ïa ka jingshngaiñ na ka bynta ki paidbah nongleit-nongwan.
Ki la pynpaw ruh ba kin ai ïa ka jingïa treikam kaba pura ryngkat bad ka tnad pulit ym tang ha ka ban talasi kali, hynrei khamtam eh ruh ban pynduh jait ïa ki kam sniew bad wanrah ïa ka imlang ka sahlang kaba shngaiñ bad ka suk ba saiñ.
