Shillong, Risaw 17
Ka Bharatiya Janata Party ka pdiang sngewbha ïa ka sienjam u Myntri Rangbah ka Jylla u Conrad K. Sangma, ba u la shim ïa ka sienjam ban khot jingïalang ïa ki nongshnong shnong haba ïadei bad ka jingkiew ki kam sniew ba jia ha kylleng ka East Khasi Hills District khamtam eh hapoh ka nongbah Shillong.
“Kane ka sienjam ka pyni ïa ka jingïatreilang ban shimkhia ban wanrah biang ïa ka jingshngaiñ ki paidbah bad ban pynthikna ruh ïa ka jingbit jingbiang ki nongshong shnong. U Myntri Rangbah u shah shkor ïa ka jingkwah u paidbah ban weng noh ïa ki jingeh kiba naduh na tynrai bad ka jinglah ban pynmih ïa ki lad ki lynti kiba biang bad ban ïoh ïa ka jingsynshar ba bit ba biang,” Ong ka kyrwoh khubor u State General Secretary BJP Meghalaya Pradesh u Bah Wankitbok Pohshna.
Shuh-shuh u la ong, Kane ka jingïalang ka la wan hadien ka jingdawa ka BJP Meghalaya ïa ka synshar ka khadar kaba ïaid beit ïaid ryntih. “Ngi sngewkmen ba ka Sorkar ka la shimkhia haba ïadei bad ka jinglong jingman kaba don mynta bad ka la sdang ïa ka jingïakren kaba thmu ban pynkylla ïa ka rukom treikam bad ban ai jingïada ïa ka imlang sahlang,” u la ong.
“Ngi kyntu ïa ka Sorkar ba la ïalam da u Conrad K Sangma ban bud ryntih da ki sienjam kiba skhem kiba kynthup ban pynkhlaiñ ïa ki bor ka aiñ ha ka imlang sahlang, ban pynkhlaiñ ïa ka jingpeitngor ha ki shnong ki thaw, ka jingkitkhlieh ha ka jingpynïaid ki bor distrik, ban buh hakhmat eh ïa ka jingshngaiñ ki khynnah bad ki lad ban pynbeit ïa ki jingeh jong ki paidbah,” la ong u Bah Wankitbok ha ka kyrwoh.
“Ka BJP Meghalaya ka pynneh ïa ka jingïatreilang ha ka rukom kaba ïatei bad ka Sorkar, ki seng bhalang ban wanrah ïa ka Meghalaya kaba shngaiñ, ngi ngeit ba kane ka khyllipmat ka dei ban long kum ka jingkylla, ha kaba ka jingsynshar ka kiew, ban pyndep ïa ki jingangnud jong ki paidbah bad ka hok kam ju pynslem ne kyntait. Ai ba kane kan long ka jingsdang jong ka jingïateh kaba thymmai hapdeng ka Jylla bad ki nongshong shnong jong ka ha ka jingshaniah, ka jinglong hok bad ka jingtreilang baroh,” u la bynrap.
