Nongstoiñ, Risaw 17
Ha ka janmiet jong ka 16 tarik u bnai Risaw, uwei u rangbah briew uba la tip kyrteng kum u Balentin Lyngdoh Marshillong (53 snem ka rta) na ka shnong Risiang WKHD, u la khlad noh hadien ba u la ngam jyllop ha ka Wah kaba don hapdeng jong ka shnong Risiang.
Katkum ka tyllong khubor ba la ïoh lum, la ong ba katei ka jingjia ba sngewsih ka la jia ha ki por kumba 8 baje mynmiet bad ïa ka met jong utei u rangbah la lah ban sei noh napoh katei ka Wah hadien kumba 2 kynta lyngba ka jingïarap ka kynhun pulit Fire and Emergency Service na Nongstoiñ. U Sordar ka Shnong Risiang u la ong ba utei u rangbah hadien ba u la ïashongkai bad ki para shnong u la leit sha katei ka Wah da ka jingthmu ban sait kti hynrei u la kum hap harud wah bad u la kam ruh sha shiliang ka wah bad don ki briew kiba ïohi ki la pyrshang ban leit tan ïa u hynrei u la ong ym lei-lei un sum shuwa.
Shuh shuh la ong ruh ba hadien katto-katne por, kynsan-kynsan ki la shu ïohi ïa utei u Rangbah ba u la ngam jyllop noh katba u dang ngam sha shiliang ka wah, mar kumta hi ki khun jong u ki la leit ngam ha katei ka Wah ban wad ïa u bad la ong ruh ha katei ka jaka ba u ngam kam da dei kaba jylliew hynrei ki khlem lap satia bad ka la don ruh ka jingïapyrshang wad da ki paidbah nongshong shnong hynrei khlem ïoh ne lap satia bad dei tad hadien ynda la wanpoi ki pulit ka tnad Fire and Emergency Service sa lah ban sei noh ïa ka met jong u.
