Shillong, Risaw 17
Ka Meghalaya Pradesh Youth Congress (MPYC) ka la pynpaw ka jingpyrshah jur halor ka jingthung ka Sorkar Jylla ïa u Deputy Commissioner (DC) ka West Garo Hills kum u Principal Secretary ka Garo Hills Autonomous District Council (GHADC).
Lah ban kdew ba ka jingdonkam jong ka Sorkar ban thung Principal Secretary kadei na ka bynta ban peit ïa ka Escrow Account jong ka GHADC ïa kaba ka Sorkar Jylla ka la dep ban pyllait T.79.5 klur ban siew tulop ïa ki nongtrei.
Ha ka kyrwoh ka MPYC ka la pynrem jur ïa ka Sorkar Jylla kaba thung da u Vibhor Agarwal u DC ka West Garo Hills kum u Principal Secretary ka GHADC.
“Kane ka rai jong ka Sorkar Jylla ka long ka jingthombor ïa ka nongrim jong ka khyrnit ba hynriew bad ïa ka riti synshar ka Ri India kaba dei na ka bynta ban ïada ïa ka hok bad ïa ka jingithuh kyrpang ki riewlum ka thaiñ Shathei Lammihngi (Northeast India)” la ong u President ka MPYC u Timjim Momin.
Ka MPYC ka la ong ruh ba dei ha ka por ba synshar ka seng Congress ba ka Sorkar ka la ai da ka khyrnit ba hynriew ban ïada ïa ka jinglong kyrpang ki riewlum hapoh ka ri India.
“Ym lah ban mutdur ba ka Sorkar Jylla ha ka jingïalam ka National People’s Party (NPP), ka pyrshang ban pyntlot ïa ka khyrnit ba hynriew da kaba thung da u Deputy Commissioner kum u Ophisar ban peit ïa ka rukom pyndonkam pisa hapoh GHADC. Kane ka pyni ruh ba ka Sorkar ha ka jingïalam ka NPP, ka kwah ban teh kyndon ïa ka District Council ha ki Ophisar Sorkar” ka la kynnoh.
Ka Congress ka dawa na ka Sorkar Jylla ba kadei ban weng mardor ïa ka rai ban thung Principal Secretary bad kadei ban pynthikna ba ka GHADC ka treikam khlem kano-kano ka jingshah teh kyndon katkum ka bor ba ai ka khyrnit ba hynriew.
“Kane ka sienjam ba shim ka Sorkar ka pyni ïa ka jingtlot bor ka rukom treikam ka Executive Committee (EC) ba synshar ha GHADC. Lada ka EC ba mynta kam lah ban pyntyllun ïa ki kam jong ka Council kadei ban hiar shuki noh ban ailad ïa kiwei pat kiba lah ban treikam katkum ka jingangnud ka khyrnit ba hynriew” ka la ong.
