Shillong, Risaw 17
Ka Mawlai ka la nangjam ban ïoh rah ïa ka nam lahduh ha ka Shillong Premier League 2025, hadien ba la lah ban pynliem ïa ka Nongrim Hills da 3-0 kol ha ka sngi Thohdieng ha SSA Stadium kaba ha First Ground, Polo.
Kane ka nam jop ka la wan urlong lyngba ki ar kol ba la thep da u Robertson Khongriah (54 & 84) bad u Banraplang Pyngrope (76) na ka bynta ban pynlong ïa kane ka kynhun ban don ha ka jingïaknieh (18 poiñ) bad ka Shillong Lajong FC (18 poiñ), kaba la tam lyngba ka jingïapher ha ka jingthep kol.
Hynrei ka Shillong Lajong kan pynkhreh ïa ka jingïalehkai ha ka sngi Saitjaiñ bad lada ka lah ban pynliem ïa ka Nangkiew Irat, ka SLFC kan rah ïa ka nam lahduh kaba hynriew ha ka SPL. Hynrei lada ka ïakhaid ne ka shah rem, ka jingkhang kan plie wang ïa ka Mawlai bad ka donkam ban jop ïa ka Rangdajied United ha ka jingïalehkai kaba khatduh ka ban long ha ka lah sngi U Blei.
Watla ka Lajong bad ka Mawlai ki la ïaryngkat mar 18 poiñ, hynrei ka jingkyrmen kan dei ïa ka SLFC namar ka lah ban pynliem teng ïa ka Mawlai da 4-3 kol ha ka 1 tarik mynta u bnai.
Ha kawei pat ka liang ka Langsning (20 poiñ) ka dang bat ïa ka kyrdan ba hakhlieh, hynrei ka dang hap ban ap na ka jingmih hapdeng ka SLFC bad ka Mawlai. Lada jia ba kine ki kynhun ki ïakhaid, ka Langsning ka don jingkyrmen ban rah ïa ka nam lahduh.
Hadien ba kine ki kynhun kim shym la lah ban thep kol ha ka kylla step, hynrei ka Mawlai ka la lah ban ïalehkai bha ha ka kylla miet bad ka la ïoh ban thep lai kol na ka bynta ban khur syndon ïa ka jingjop.
Lyngba kane ka jingshah rem, ka Nongrim Hills ka la ïai sah ha ka kyrdan ba shatrai bad 1 point. Kane ka kynhun kan hiar kyrdan noh sha ka First Division na ka bynta ka aïom ban wan.
Ka jingkylli mynta, mano pat ban synran lang ïa ka Nongrim Hills sha ka First Division bad kane kan shong ha ka jingmih na ka jingïalehkai hapdeng ka Malki SC pyrshah ïa ka Sawmer SC, ka ban long ha ka sngi Saitjaiñ ha ka por 1:30 nohphai sngi, katba ka Nangkiew Irat bad ka Lajong ha ka por 4:30 nohphai sngi.
