Tang ba pynhap kopi, shoh u nonghikai bar jylla ïa u khynnah haduh da phlei snam ha KV, NEHU

Shillong, Risaw 17

U wei u khynnah skul jong ka Kendriya Vidyalaya (KV), North Eastern Hill University (NEHU), u la shah shoh dusmon ha u wei u nonghikai bar jylla haduh ba un da phlei snam na u khmut.

Une u nonghikai bar jylla ba hikai ha katei ka skul u dei uba la tip kyrteng, u Niren Chan-dra Roy uba hikai ïa ka subjek Hindi ha ka klass VI.

U ne u khynnah uba la shah shoh u dei ba la tip kyrteng u Laweingi Lyngdoh Mawlong, ba 12 snem ka rta bad uba shong ha ka klas VI.

Haba ïoh ban ïakren bad u nongthoh khubor jong u Nongsaiñ Hima, u ne u khynnah u la ïathuh ba u Niren uba dei u nonghikai, u la shoh ïa u tang na ka daw ba u ïoh pynhap ïa ka kopi ha madan.

Kane ka jingjia kadei kaba la jia ha ka step jong ka 17 Tarik u Risaw 2025, ha ka por kumba 11 baje eiei.

Nalor kata, u Laweingi Lyngdoh u la ïathuh ba u Niren u la shoh eh na ki bynta jong ka met da ka kti, ha kaba u la ïoh ban sangah ha ka ben ba u shong bad u la mih snam na u khmut, da kaba pyni ruh ïa ka jaiñ lumar ba u la ñiad ïa ka snam kaba mih na u khmut jong u.

Shuh shuh u la ong ba ha ka por ba u pynhap ïa ka kopi ha madan u Niren u la tan ïa u, na u shñiuh khlieh bad thap nadien haduh ba u la mih snam jur na u khmut.

Na ka liang jong u Kpa jong u ne u khynnah, u Bah Jubanlang Kharbihkhiew u la ïathuh ba mar shu ïoh jingtip ïa kane mar-mar u la wan sha katei ka skul, da kaba ong ba un sa ujor ejahar pyrshah ïa une u nonghikai bar jylla uba la shoh dusmon ïa u khun.

“Ym tang ba u ne u nonghikai u jrong kti hynrei u la pyndonkam da ka bor ban shoh haduh ba un da mynsaw jur,” u la ong.

“Kum u kpa kaei ba ngan leh ka long ban pyntikna ba ki khun jong ka ri bad ka jaitbynriew ka jong ngi, kin ïoh ïa ka jingstad ha ka rukom kaba dei bad ba kin ïoh ruh ïa ka hok ka jong ki, haba ki shah ban beiñ ha ki skul ne ha kino-kino ki jaka. Bad kan long ruh ka jinghikai ïa baroh ki nonghikai ba kim dei ban shim ha lade ïa ka aiñ ha la ka jong ka kti, ban tam ‘ti tam ‘jat, u la bynrap.

“Ka aiñ ka dei ban shim ïa la ka jong ka lynti halor ka jingshah ban beiñ ïa u khun jong nga,” la bynrap shuh shuh u Bah Jubanlang.

Hadien kane na ka liang ki bor pulit mar-mar ki la wan ha katei ka skul ban pynlong ïa ka jingtohkit kaba bniah.