Washington, Risaw:
U President ka United States, u Donald Trump, ha ka Sngi Balang u la pynpaw paidbah ba u Myntri Rangbahduh ka India- u Narendra Modi, u la iathuh ha u, ba un nym thied shuh ia ka umphniang jong ka Russia, kaba long ruh ka rai jong u Modi, ba u Trump u la ai jingiaroh haduh katta bad u la ong ruh ba kane ka long kawei na ki lad ban pynsah marwei ia ka ri Russia.
Kumta, u Trump u la ong ba u sngewsih shibun eh ia ka jingthied jong ka India ia ka umphniang na Russia bad u la ong ba u Modi ha katei ka sngi u la kular ia u Trump ba un sangeh noh ia ka jingpynpoi umphniang na Russia.
Namarkata, u Trump u la iaroh shibun ia ka rai jong u Modi bad ong ruh ba un pynsngewthuh ia ka China ruh ba kan leh ia kajuh, khnang ba ka Russia kan sangeh noh ia ka thma ha Ukraine.
Watlakatta, la ong ba ka tnat ‘Embassy’ jong ka India hapoh Washington, kam pat shym la kren ne pynphai ktien halor kane ka jingkren jong u Trump, la u Modi u la kren shisha ne em ia kitei ki kyntien kumba u Trump u la pynpaw paidbah ha kane ka kynti.
Namar u Trump u la ong, ba ka Russia ka la pyneh haduh katne, dei namar ka jingdon jong ki paralok jongka, kynthup ia ka China bad ka India kaba ju thied ia ka umphniang jongka bad kaba ju kyntiew ia ka ioh ka kot ka Russia wat hapdeng ka jinghiar jongka namar ka thma ha Ukraine.
