Jowai, Risaw 19
Ka NPP Primary Unit Panaliar ha ka 18 tarik Risaw ka la sdang ïa ka lympung ïalehkai Super 7 Knock-out Football Tournament halor ka phang ‘To rise above the influence, choose life not substance abuse’.
Ka thong jong kane ka lympung ka long ban ïakhun pyrshah ïa ka jingpyndonkam drok.
Ka lahduh ha kane ka lympung kan khur ïa ka song pisa kaba T. 40,000, ka kynhun ba ar T. 20,000.
Ïa kane ka lympung ïalehkai la plie da u kongsan Eddistone Shylla ha ka jingdonlang u symbud kongsan Wanna Lyngdoh ha ka jingïalang kaba la pynïaid da u Lonely Phira Vice President NPP Panaliar ha madan bol ka Panaliar.
U Marryngkat Syngkon Secretary ka Panaliar ula kyntu ïa ki samla khamtam ban kiar na ki jingpynshoi ha ki jingsniew ba bun jait.
U Wanbha Lyngdoh ula kyntu ïa ki samla ban tur shakhmat ym ban long kiba jaipdeh namar ka jingïalehkai phutbol ka long ka lad kamai ka juk mynta.
U Eddiestone Shylla ula kyntu ïa ki samla ban pyndonkam ïa ka rukom ïalehkai katkum ki madan bad ban don ka mynsiem ïalehkai ne ‘Spirit of Sportsmanship’. Ula kyntu ruh ïa kiwei ki Unit ban pynlong ïa kum kine ki program hapoh ki shnong ki thaw jong ki.
La ïoh ruh ka jingnguh blei na u Marki Lakadong bad ki kyntien khublei na u Heipor Syngkon Secretary NPP Youth Wing Panaliar.
Ha ka jingïalehkai ka Panaliar kala jop ïa ka Lumsuwe da 4-3 kol.
