Washington, Risaw:
U President ka United States, u Donald Trump, ha ka Sngi Palei u la byrngem ia ka Hamas bad ong ba lada ka Hamas ka dang iai bteng ban pynkheiñ ia ki kyndon jong ka jingiateh soskular ban sangeh iasiat noh shi syndon ha Gaza Strip, ka US kam don lad shuh lait na ka ban leit ban rung hi noh syndon bad ban pyniap duh syndon ia ki baroh.
Kane ka jingbyrngem ba shyrkhei jong u Trump ka long hadien ka jingiadon bynta jong u, ban leit iakren pyniasuk hapdeng ka Israel bad ka Hamas, da ka jingiatreilang jong ka Egypt ban pynlong ia ka jingiakren iasuk bad ka jingiateh soskular ha katei ka ri.
U Trump myn ha ka Sngi Ba-ar, u l aong ba ka Hamas ka la shim noh ia ka kyrdan jong ki katto- katne ki runar ba shyrkhei kiba la bud-nam bha bad ka la pyniap noh ruh ia ki katto- katne ki dkhot ba shyrkhei jong kitei ki kynhun runar kiba don hapoh u pud- u sam jong ka jingkhmih jongka.
Hynrei u Trump u la kren shai ruh halor ka por iai shah jong u, ba lada ka Hamas kam lah ban bat ia ki kular kiba ka la khlei ha ka por ba ka US ka dang leit ban pyniakren iasuk hapdeng jongka bad ka Israel hapoh Egypt.
Namarkata, u Trump u la ai por ia ka Hamas ba kan buh noh ia ki tiar ïakhun jongka baroh, khnang ba kiei- kiei baroh kin long kiba ïaid beit- ïaid ryntih bad lada ka Hamas kam leh kumba la bthah, ka US hi da lade kan pykut ia ka Hamas khlem da aipor ne ailad shuh.
Namar la ong ba ka tnat pahara jong ka Hamas, ka la ialeh katba lah ban pyntikna ia ka shongsuk- shongshnaiñ jong ki paidbah hadien ba ki lehnoh ki la ioh ban knieh ia ka bor synshar hapoh Gaza ha ki 18 snem ba la leit. Hynrei katei ka tnat pulit ruh ka la um noh tang kumba katto- katne bnai, hadien ba ki shipai ka Israel ki la kurup noh ia kiba bun tylli ki bynta kiba kham heh jong ka nongbah Gaza bad ka la sdang ban leit thombor ia ki bor pahara jong ka Hamas da ki liengsuiñ.
