Shillong, Risaw 19
Ki ar ngut ki ‘thei ïalehkai ka jylla kiba la don bynta ha ka kynhun ïalehkai U-17 Women’s Football Team ka Ri India, kaba la thaw histori da ka jingïoh rung sha ka AFC U-17 Women’s Asian Cup 2026, kiba la wan phai sha la ka jylla ha ka sngi U Blei, ki la shah pynkup burom ha u Bah Sanbor Shullai, uba dei u Myntri ka Sorkar Jylla bad ruh u MLA ka South Shillong.
Ki arngut ki samla ka Jylla Meghalaya kiba la ïadon bynta bad ka kynhun U-17 ka India ki long ka samla Bonifilia Shullai bad Alisha Lyngdoh, kiba la trei shitom bad don bynta ban pynurlong ïa ka jingphoh sniew ka ri ban rung sha ka AFC Cup hadien 21 tylli ki snem.
Na ka liang jong u Bah Sanbor hadien ba u la ïoh jingtip ba ka kynhun ïalehkai ka India ka la wan phai sha la ka ri bad ba kitei ki ar ngut ki ‘thei ïalehkai ruh kin wan phai sha la ïing ha ka sngi U Blei, kumta mar mar u la pynbeit ban pynlong ka jingpynkup burom ïa ki bad ha kane ka sngi ba ki wan phai, u la ïoh ban pynlong ïa kane ka jingïalang kaba rit ha Orchid Lake Resort, Umiam ha Ri-Bhoi.
Une u Myntri Sorkar u la ai sngewbha ïa kine ki ‘thei samla da ka song pisa ba mar T.50,000 lem bad ki memento bad ki jaiñ kilan met, kaba u la thied na ka MLA Discretionary Grant.
Haba kren ha ka jingïalang, u Bah Sanbor u la pyntip ba haba ïoh jingtip ïa ka jingwan phai jong kine ki ‘thei ïalehkai, mar mar u la pynbeit ban pynkup burom ïa ki bad u la ïakren ruh ïa u Myntri Rangbah ka Jylla Conrad K Sangma, Symbud Myntri Rangbah Bah Prestone Tynsong bad u Myntri kam ïalehkai ban pynkup burom ïa ki.
“Nga pynkup burom ïa ki mynta ym tang kum u nongmihkhmat paidbah hynrei kum u Myntri ka Sorkar. U Myntri kam ïalehkai u la ai ktien ba ka Sorkar kan sa pynbeit kyrpang ïa ka jingïalang ban pynkup burom ïa kine ki arngut ki ‘thei ïalehkai ka Jylla kiba mihkhmat ïa ka Ri,” u la ong.
U la ong ba kum u MLA u ju ïoh ïa ka Discretionary Grant ba T.20 lak shisnem-kaba la ai sha baroh ki 60 ngut ki MLA ba kin pyndonkam ha kino kino ki kam kiba kyrkieh bad ki bym lah ban tip lypa. “Nga ai khublei ïa u Symbud Myntri Rangbah Bah Prestone Tynsong uba khmih ïa ka Parliamentary Affairs, uba la ai jingmynjur ban pyllait ïa ka song pisa ban ïarap ïa kine ki ‘thei ïalehkai”.
U Bah Sanbor u la kitbok kitrwiang ïa kine ki ‘thei ïalehkai ba kin nang kiew shaphrang ha ka jingim jong ki bad ba kin nang wanrah shuh shuh ïa ka nam ka burom ïa ka Jylla bad ka jaidbynriew baroh kawei.
