Shillong, Risaw 19
Ka Dr. L Ïawbor Director jong ka Meghalaya Aids Control Society (MACS) ka la pyntip ba katkum kiba la pynithuh ïalade ki nongpang HIV haduh mynta ki don kumba 10,713 ngut hapoh ka Jylla Meghalaya.
Ïa kane ka Dr. L Ïawbor ka la ïathuh hadien ba la wai ka prokram ba la pynlong ha u Soso Tham ha ka 18 u Risaw 2025, halor ka jingpang HIV ba kumno ban ïada ïalade ban lait na u ne u jingpang.
Haba ïakren bad ki lad pathai khubor ka Dr.Iawbor ka la ïathuh ba napdeng kine ki 10,713 ngut kiba bun ba ïoh ïa kane ka jingpang ki dei na East Jaiñtia Hills bad West Jaiñtia Hills District.
Ka la ïathuh ba ki briew kiba im bad u HIV ha ka jingsumar ki don 7,022, ka jingkheiñ lang jong ki khynnah kiba im bad u HIV (PLHIV) ki long 398, bad ka jingduh ban buddien na ka jingsumar ki long 1,585.
Haba kylli ka la ïathuh ba napdeng kine kiba ïoh ïa kane ka jingpang HIV ki don lang bad samla bad rangbah ruh kumjuh.
“Kiba bun na ki, ki dei ki samla. Palat ïa ka 52% ki dei kiba hapoh ka 30 snem ka rta,” la ong ka Dr.L Ïawbor.
Shuh shuh ka la ong, ban tehlakam ïa kane ka jingjyllei kiba ïoh pang HIV, donkam ka jingpynsngewthuh ne ka awareness prokram bad ka la kyntu ruh ïa kito kiba don ïa u ne u khñiang jingpang ba kin mih shakhmat ban phah sumar.
