Shillong, Risaw 19
Ka kynhun ïalehkai ka Shillong Lajong FC (kaba bat ruh ïa ka nam kum ka lahduh) thiaw ka la duh syndon ïa ka kabu ksiar ban rah biang ïa ka nam lahduh jong ka lympung ïalehkai Shillong Premier League ka Shillong Sports Association bad kane ka la wan ba ka shu ïakhaid pyrshah bad ka Nangkiew Irat SC (0-0), ha ka jingïakhun kaba la long hynne ka janmiet, ha madan SSA, First Ground, Polo.
Haba phai sha kane ka jingïakhun, ka kabu ksiar ka la noh bha sha ka kynhun ïalehkai ka Lajong namar ba ka la hap ba kan ïakhun pyrshah ïa ka Nangkiew Irat kaba la hap ban lehkai noh tang 10 ngut ki ‘player’ ha madan, hadien ba u Khangmiki Pale tang hapoh 36 minit jong ka jingïakhun u la la ïoh artylli ki yellowcard, kaba pynlong ïa u ban hap ban mih noh shabar ka madan ïakhun.
Hynrei u ‘ranglehkai ba kynsai tam ha kane ka janmiet jong ka jingïakhun dei u ‘rangap kol jong ka Nangkiew u Akash Thapa, ha kaba ula lah shisha ban ïeng ïada ïa la ka jong ka kol na kiba bun sien ki jingpyrshang na ki ‘ranglehkai lehkai shakhmat ka Lajong, ne ba ka bok ka nusip kam shim la thaw sha kane ka kynhun ha kaba saw tylli ki kabu ksiar la dei beit ïa ka diengkol.
Kumta ha kaba kut jong kane ka jingïakhun, ka Shillong Lajong FC kan pynkut ïa ka samoi ïakhun ka jong ka ha kane ka lympung hadien ba ka la ïoh ba kan khur 19 poiñ, kaba ïa mynta kan don ha ka kyrdan kaba ar.
Kumta ka rai mano napdeng ki kynhun ban ïoh rah ïa ka nam lahduh kan long tad ha ka jingïakhun kaban long ha ka sngi nyngkong ka jingïakhun hapdeng ka Mawlai SC pyrshah ïa ka Rangdajied United FC, kaban sdang ha ka por 4:15 nohphai sngi, ha kaba kane ka jingïakhun la dei ban pynlong ïa ka myn ha ka 9 tarik mynta u bnai, hynrei namar ka jingther noh u slap la hap ban pynsangeh noh ïa ka.
Lada jia ba ka kynhun ïalehkai jong ka Mawlai ka jop ïa kane ka jingïakhun, kan khreh ba kan rah ïa ka nam kum ka lahduh jong kane ka lympung mynta ka samoi, hynrei lada jia pat ba ka ka shah rem ne ïakhaid, ka nam lahduh kan leit sha ka Langsning FC.
Hiar ka Malki hadien ba shah pynliem ha ka Sawmer. Ha shwa jong ka jingïakhun ka Nangkiew bad ka Lajong, ka Sawmer SC ka la pynliem ïa ka Malki SC da 3-1 kol.
Ïa ki lai kol ka Sawmer SC la thep da u Diego Khyriem (32′), Michaelson Kurbah (45′) bad Khainkupar Iawphniaw (84′), katba ïa ka shi kol ka Malki SC la thep da u Fashioning Syngkli (87′).
Kumta hadien kane ka jingshah rem ka Malki SC kan hiar noh sha ka kyrdan ïakhun jong ka First Division.
