Shillong, Risaw 19
Ka shnong Nongrah kaba hap ha nongbah Shillong ka la mad ïa ka jingsngewsih namar tang hapoh shisnem ki don haduh lai ngut ki mynsiem briew kiba la shah pynïap, kata ar ngut ki heprit bad kawei ka longkmie.
Ka jingjia shah pynïap ha Nongrah kaba sngew triem ka dei ka jingshah pynïap ka longkmie ha u kurim lajong kaba ki sahlang ha ïingwai ha Nongrah Nonglum Brei kaba la jia ha ka 25 tarik Jymmang 2025.
Kane ka longkmie kaba shah pynïap ka dei kaba la tip kyrteng kum ka Kong Priya Khongstia kaba 24 snem, na Umñiuhtmar, katba u kurim u Donald Sohtun 30 snem ka rta uba dei uba la kynnoh donkti u sah ha Mawpynthih.
Kane ka jingshah pynïap ka Kong Priya ha u kurim ka dei kaba shu ksih na ryndang bad tied na khlieh haduh ban da khlad.
Ïa ka metïap ka Priya la lap ha ka 30 tarik Jymmang ha katei ka ïingwai hadien ba ki trai ïing ki ïohi ba ka ïing ka la kynjah.
Hadien saw bnai pat ka shnong Nongrah ka la ïoh ïa ka khubor ba iwei I heprit iba kyrteng Insaphira Lyngdoh Mawnai iba dang saw snem ka rta ba shong ba sah ha Nongrah Nonglum Brei, i la jah na ïing ha ka por 8:15 baje mynstep jong ka 14 tarik Nailur 2025 hynrei haba la wad ïa i la lap pynban ha ka step jong ka sngi ba bud kaba dei 15 tarik Nailur ba i la shah pynïap ha kawei ka ïing ba dang shna thymmai.
Haba ki pulit ki la tohkit ïa u khynnah uba la ïalehkai lang ha ka step jong ka 14 tarik Nailur u la phla ba dei ma u ba ïalam ïa itei i heprit.
Katba ki pulit ki dang pynlong ka jingtohkit ïa ka jingjia ïa i Insaphira, la ïoh sa kawei ka khubor ba la jah sa u heprit ba hynñiew snem na Nongrah Lum Myrboh ha ka 8 tarik Risaw 2025 bad la lap pynban ïa ka metïap jong u ha ka sngi ba bud ha ka 9 tarik Risaw ba la buh ïa ka metïap harud surok ha shnong Mawpat.
Haduh mynta ki pulit kim pat lapksai mano ba donkti ban pynïap ïa une u heprit uba la jah na ïing katba u dang ïalehkai ha ka por 4:00 baje janmiet.
