Kyiv, Risaw:
Katkum ki khubor, la ong ba uwei u nongthoh khubor jong ki lad pathai khubor jong ka Russia, u la iap ha ka jingleit thombor jong ki Drone ka Ukraine, ha ka bynta jong ka Ukraine kaba la hap hapoh ka jingkhmih jong ka Moscow, ha ka thaiñ Zaporizhzhia jong ka Ukraine, kaba dei ka jaka die khubor jong u.
“U nongthoh khubor shipai jong ka RIA Novosti, u Ivan Zuev, u la shah pyniap ha ka thaiñ Zaporizhzhia bad u paralok jong u, u Yuri Voitkevich, u la mynsaw jur bha”, la ong ka tnat treikam.
Ka la bynrap ba u Zuev u la khlad noh “ha ka kam, namar ka jingshah thombor ha ka drone jong ka Ukraine”.
U Zuev u la trei ha ka RIA Novosti la kumba katto- katne snem bad u la ioh pdiang ruh katto- katne ki khusnam jong ka nongbah.
Ka tnat kam bar ri jong ka Russia, ka la pynpaw ia ka jingsngewlem halor ka jingkhlad noh jong U Zuev bad kitbok kitrwiang ia U Voitkevich, ba un koit noh kloi ha i por i ba tang khyndiat.
Dang ha kine ki 2 taiew ba la leit, u nongthoh khubor na France, u Antoni Lallican, u la shah pyniap ha ka por ba u don ha ka kam hajan u lain ba shakhmat ha ka thain Donetsk jong ka dong mihngi jong ka Ukraine.
U paralok jongu uba na Ukraine, u Georgiy Ivanchenko, ula mynsaw ha katei kajuh ka jingshah thombor.
Ki kynhun ïada ïa ka hok longbriew manbriew ki ong ba jan ar phew ngut ki nongthoh khubor ki la shah pynïap ha Ukraine naduh ba ka Russia ka la sdang ïa ka jinghiar thma kaba pura jong ka ha u Rymphang jong u snem 2022.
Napdeng jong ki, la don ruh u nongthoh khubor video jong ka AFP, u Arman Soldin, uba la shah pyniap ha ka jingshah siat rocket ha u snem 2023.
