Shillong, Risaw 19
Jop kput ka Jakrem SC da 8-1 kol ïa ka Mawsawrit SC ha ka Group B jong ka Meghalaya Women’s State League 2025 ha ka jingïalehkai ha ka 18 tarik Risaw 2025 ha Mawlum Tyrsad.
Ha katei ka juh ka group, ka Mawlum Tyrsad SC ka la pynliem noh ïa ka Bright Future SSCC da 2-0 kol ha Shillong, ka Na Rympei FA ka la ïakhun tyngeh bha pyrshah ïa ka Attacker’s YC hynrei ka la jop da 4-3 kol ha ka Group A.
Ka Pynibha Rangthaluh (33′, 81’P, 86′) ka la thep da ka hat-trick na ka bynta ka Attacker’s YC ha kaba dei ka Ri-Bhoi District Sports Association hynrei ha bakut ka la shah rem. Ka Tracy Rympei bad ka Pynhun Shulet ki la thep ha ka minit ba 13 bad 16 kaba la pynlamkhmat ïa ka Na Rympei da ar kol shwa ba ka Pynibha kan thep biang sa kawei. Nangta ka Tracy bad ka Pynhun ki la thep sa kawei mar kawei ha ka minit kaba 78 bad 80 na ka bynta ka Na Rympei ban jop da 4-1 kol bad ka jingïalehkai ka la long kaba la kut noh.
Ha Mawlum Tyrsad, ka Jakrem (jong ka Mawkyrwat DSA) ka la pynliem noh ïa ka Mawsawrit jong ka Tyrsad Area Sports Association da 8-1 kol. Ka Chibasal Sangma (22′), Iaphisha Marbaniang (30′, 47′, 72′, 85′) Bahunlang Synrem (38′), Baiashisha Lyngkhoi (82′) bad ka Cathrine Kharkongor (88′) ki long ki nongthep kol ka Jakrem bad ka D Umdor (57′) kaba ïoh thep shi kol na bynta ka Mawsawrit.
Hadien, ka L Khongsit (4′, 38′) ka la the par kol ha ka kylla step na bynta ka Mawlum Tyrsad (Tyrsad Area SA) ha ka jingïakhun pyrshah ïa ka Bright Future (Pyndengumiong DSA). Kane ka dei ka jingiakhun kaba khatduh na ka bynta baroh arliang mamla. Ka Mawlum Tyrsad kaba khlem shah rem ka la kamai 13 poiñ na ki san tylli ki jingïakhun bad ka la pynthikna ïalade ban ïoh ïa ka kyrdan ba nyngkong ha ka kynhun ha shwa ban ïakhun ïa ka wat ban wan.
