Guwahati, Risaw 19
U Myntri Rangbah ka Assam u Himanta Biswa Sarma u la pynthikna ba ka Block-I bad Block-II kin hap beit ha West Karbi Anglong hapoh u pud u sam ka Karbi Anglong Autonomous Council (KAAC) bad ba ka Sorkar Assam kan sa sieh mawpud noh katkum ka Notification ka Sorkar ba 17 tarik Naiwieng 1951.
Kane ka jingpynthikna bad pynpaw jong u Himanta ka la long ha ka jingïalang bad ka kynhun jong ki seng bapher bapher jong ki paid Karbi kiba kynthup ïa ki nongïalam ka Karbi Students’ Association (KSA), Joint Action Committee for Autono-mous State (JACAS), Karbi Youth Association (KYA), Karbi Farmers Association (KFA), Karbi Unemployed Youth Association (KUYA), Karbi Students’ & Youth Council (KSYC) bad ka Karbi Anglong Women Justice Forum (KAWJF) ha ryngkat ka jingsynran jong u CEM ka KAAC u Tuliram Ronghang kaba long ha ka sngi Saitjaiñ ka 18 tarik Risaw, 2025 hadien ka jingmih jong ka jingïakynad ba dang shen ha Tapat (bala tip kum ka Lapangap), kaba la shim ïa kawei ka mynsiem briew.
Ha kane ka jingïalang, u Myntri Rangbah ka Assam u la pyntip ba ka Sorkar Jylla kan sa shim ïa ki lad jingïada kiba khlaiñ bad ka jingtheh ïa ki kam pynroi ha Tapat (bala tip kum ka Lapangap) ba kynthup ïa ka jingbuh noh ïa ka battalion camp ba shirta, ka ban ai jingïada ha kane ka thaiñ.
Uwei u briew na Tapat ba kyrteng u Orivel Timung (45) u la ïap ha ka jingkulmar kaba la jia hapdeng ki paid Karbi bad ki paid Pnar ka shnong Lapangap dang shen. Kane ka jingjia kala jia ha ka por ba ki paid nongshong shnong ka Lapangap ki dang leit ot kba sha lyngkha hapdeng ka jingpahara ki Pulit. Hynrei, ka kynhun ki paid Karbi kila wan mih kynsan ban pynthut, kaba lam sha ka jingïashoh kaba la poi sha ka jingïap briew.
Ka jingkular u Myntri Rangbah kala wan kum ka jubab ïa ka dorkhas ba la aiti da kiba bun ki seng ki samla pule Karbi. U Myntri Rangbah u la pynbna ïa shibun ki lad jingïada da ka jingthmu ban wanrah pat ïa ka jingsuk bad pynthikna ïa ka bha ka miat jong ki nongshong shnong ha kane ka thaiñ khappud kaba jur ka jingïakynad.
Kum shibynta na ka jingkular, u Himanta u la ong ba ka Sorkar kan sa buh noh ïa ka battalion camp kaba shirta ha ka shnong Tapat/Lapangap ban pynkhlaiñ ïa ki lad jingïada. Ka Sorkar Assam kan siew ïa ka song jingïarap pisa kaba T.10 lak bad ka kam sorkar hapoh ka Karbi Anglong Autonomous Council (KAAC) ïa ka longïing u Orivel Timung.
La kular ruh ban dang pynneh pynsah ïa u pud u sam katkum ka jingpynbna jong ka Sorkar ha ka 17 tarik Naiwieng, 1951 bad ban ai ka jingkular ban pynïeng biang ïa ki mawpud kiba biang ha kitei ki jaka bad u Himanta u la pynthikna ruh ba ka Block-I bad Block-II ha West Karbi Anglong ki dei hok ka bynta jong ka Karbi Anglong katkum ka jingpynbna ha ka 17 tarik u Naiwieng, 1951 bad ba kan nym don kano kano ka jingpynkylla ïa une u pud u sam.
Nalor ki lad jingïada, u Himanta u la pynbna ruh ïa ki sienjam ban pynkhlaiñ ïa ki lad ai jingsumar, ka pule dangle bad ki jingtei ha ki shnong khappud. U la kular ruh ba un sa leit hi dalade sha Tapat/Lapangap ha u Naiwieng ban peitthuh ïa ka jinglong jingman ha kane ka shnong.
Haba ñiew ïa ka jingïalang kum kaba sngewtynnad, ki nongïalam ki seng Karbi kila pdiang ïa ka jingkular ka Sorkar Jylla ban leh eiei halor ki kam ai jingïada bad ka roi ka par ha ki shnong khappud.
