Lada ngi shakri bad ngi duwai ïa u Blei man ka khyllipmat ruh ne kumba duwai u Daniel lai sien shi sngi ruh ngim ym ioh ka jingkyrkhu kaba kyrpang na u Blei. Kum ki briew ngim don jingïapher eiei ha khmat u Blei la kiba don ha kano kano ka kynhun niam ne ki bym long niam ruh ki ioh ïa kajuh ka jingieit bad jingkyrkhu na u Blei. U Blei u ieit ia baroh ki jaitbynriew kiba don ha satlak ka pyrthei.
Naduh myhyndai haduh kine ki sngi ruh ki briew ki iaroh, ki duwai bad ki pyndonburom ïa u Blei ha la ki jong ki jong ki jingleh niam. Ym don jingïapher ban khot kyrpad ïa u Blei nongbuh nongthaw ïa ngi ki briew. Ngi im bad ngi heh ngi san kumjuh, ngi pang ngi shi-tom bad ngi iap ruh kumjah, ngi ioh ka bam ka dih, ka kup ka sem mar kumjuh haduh haba la dei ka por ba ngin ïeh noh ïa kane ka sla pyrthei. Ngi shakri lyngba ki jingngeit niam bapher bapher ban pynsngewbha ïa u Blei. Hynrei ym don bna ioh sartiphiket kyrpang na u Blei. U Blei u ai kajuh ïa ka sngi, u slap ka lyer bad kumjuh ïa ka jingshit jingkhriat ha ngi ki briew.
Bad kumba u Blei u la thaw ïa u shynang bad kynthei ban im bad ïa shong ïa sah ryngkat hangne ha sla pyrthei. Bad na ka bynta ka briew u briew un ïehnoh ïa la u kpa bad ïa la ka kmie bad un ïai neh bad la ka tnga.
Ngi lah ban long ki heh ki hain lane ki rit ki ria ha ka jingim hangne ha sle pyrthei. Hynrei ha kaba khadduh ka jingim jongngi ki briew ka shong ha ki ksangti jong u Blei. Ym don uwei ruh uba lait na ka pop. Namar baroh ngi la leh pop bad ngi dei ban iap ha kawei ka sngi. Namar ka dak jong ka pop ka long ka jingiap. To ai ba ka jingsuk u Blei kan synshar ha ka dohnud jong-ngi.
Ngi lah ban long kiba duk lane kiba riewspah, ngi stad ne ngi biej ngi ioh katjuh ka jingim shipor hangne ha sla pyrthei. Watla ngi long ki riewkhuid (Saint) ki Guru, ki Monk, ki Sadkhu. bad ki nongïathuhlypa ruh ngim ym ioh ka jingkyrkhu kaba kyrpang na u Blei, namar baroh ngi dei ban iap bad ïehnoh ïa kane ka sla pyrthei.
C. B. Iawphniaw
