Nongpoh, Risaw 19
Uwei u nongñiah jong ka kali kamai Auto-rickshaw u la duh noh ïa la jingim hadien ka jingshah tynrah ha kawei ka trok kaba la pynher sted bha, kaba kit ïa ki tiar Flipkart ha ka surokbah National Highway 6 ha Umling, Ri Bhoi District kaba la jia ha ka janmiet jong ka sngi U Blei.
Katkum ka tyllong khubor na ki pulit, la ïathuh ba katei jingjia ka dei ha ka por kumba 3:35 eiei janmiet katba katei ka trok kaba don ïa u registration
number AS01-SC-8025 kaba la ñiah da u Nidajan Niang, 35 snem ka rta na Shangpung, West Jaiñtia Hills, kala leit ban tynrah nadien jong katei ka Auto-rickshaw kaba don ïa u registration number ML10-D-0206 ha ki bynta ba khongwain jong ka surokbah ha Umling kat haduh ba u nongñiah ka Auto-rickshaw, uba la tip kyrteng kum u Sibu Dey, 40 snem ka rta na Byrnihat u la ngat ha ka jingmynsaw jur ryngkat ka jingbymtip briew, katba uwei pat uba ïadon lang, uba la tip kyrteng kum u Rofiqul Islam, 27 snem ka rta na Hindupara, u la ngat ha ka jingmynsaw kaba malu mala.
Ki pulit ki ïathuh ruh ba ka daw jong katei ka jingjia ka dei namar ba u nongñiah jong ka trok, u Nidajan Niang, u la pynher sted palat ïa ka kali ha ryngkat ka jingshoh khawiang kat haduh ba um lah shuh ban tehlakam bad leit ban tynrah ïa katei ka Auto-rickshaw kaba leit ban tyngkhuh pat sha ka kynroh jong ka rud surokbah bad hap sha nala, katba katei ka trok ruh kala kylla lyndang syndon.
Na ka liang ki pulit ki la pynkit noh mar mar ïa utei nongñiah Auto-rickshaw uba la mynsaw jur sha Nongpoh Civil Hospital na ka bynta ban pynïoh jingsumar, hynrei ki doctor ba dei khmih, kila pynbna ba u la dep khlad lypa bad la buh noh ïa ka met kaba sah ka jong u ha jaka buh metïap ka hospital na ka bynta ban pyndep ïa ki jingdonkam katkum ki kyndon jong ka aiñ.
Halor kane ka jingjia, na ka liang ki pulit kila rah noh ïa baroh ar tylli kitei ki kali sha thanad Nongpoh na ka bynta ban pynlong ïa ka jingtohkit.
