Shillong, Risaw 19
Ka East Khasi Hills District kala rah ïa ka nam lahduh ha ka 1st Annual Sports Meet jong ki National Health Mission Employees Association (NHM), Meghalaya, kaba la poi noh sha kaba kut ha ka sngi Saitjaiñ ha Nongkseh Sports Ground.
Ha kane ka jingïakob, ki nongïashim bynta kila pyni ïa la ka sap ka phong ïalehkai bad ka mynsiem jong ka jingïajan kaba la lumlang ïa baroh ki nongtrei ka koit ka khiah na kylleng ki bynta jong ka jylla kiba la ïashimbynta ha ki jingïakob ki bapher bapher kum ka football, basketball, badminton bad ka jingïakob tan tyllai ne ka tug of war.
Ka East Khasi Hills District kala long ka lahduh da ka jingpyni ïa ka jingïatreilang bad ka jingtbit kum ka kynhun ha katei ka lympung ïakob.
Ha kane ka sngi u MLA ka Mylliem Konstitwensi u Bah Ronnie V Lyngdoh u la ïadon lang kum u kongsan bad ha ka jingkren u la ong, “Kane ka dei ka sien kaba nyngkong eh ba la pynlong ïa kum kane ka prokram bad ka dei kaei kaei kaban sah ha ka histori bad ka khyllipmat kaba kmen ba sngewbha. Nangne shakhmat, nga ngeit skhem ba kane ka lympung ïakob kan dang long shitrhem bad kaba don jingmut ban pynmih ïa ka mynsiem jong ki nongïalehkai bad kum ka kynhun ïalehkai.”
U la kyntu ïa baroh ba ki dei ban shim ïa kane ka sienjam ban noh synñiang sha ka koit ka khiah ha ka imlang sahlang.
La pynkut ïa kane ka lympung ïakob da kaba kular ruh ban wanphai biang ha ka por ban wan bad ban bteng ïa ka rukom ban rakhe ïa ka koit ka khiah, ka jingshakri bad ka jinglong kum ki nongïalehkai.
