Ki ar ngut ki ‘thei ïalehkai phutbol kiba dei napoh ka Jylla Meghalaya, ki la lah ban kyntiew ïa ka nam ka burom ym tang jong ka Meghalaya hynrei jong ka Ri ha satlak ka pyrthei hadien ba ka kynhun ïalehkai U-17 ka India ka la jop ïa ki jingïalehkai ba la pynlong ha Bishkek, Kyrgyztan bad ban ïoh rung syndon sha ka lympung AFC U-17 Women’s Asian Cup China ka ban long ha u snem 2026. Lyngba kitei ki jingjop, ka la pynlong ruh ïa ka India ban ïoh rung sha ka lympung AFC hadien 21 tylli ki snem. Katno ka long shisha ka khubor kaba sngewtynnad bad ruh kaba pynsngew sarong ïa ki jaidbynriew Khasi-Pnar ba ki la lah ban sei ïa ki khun donsap ha ka samla Bonifilia Shullai bad ka samla Alisha Lyngdoh, kiba da tbit shisha, ym tang ba ki shah jied ha ka kynhun ïalehkai phutbol jong ka Ri hynrei ba kin da ïoh mih syndon ha madan ban ïakhun pyrshah ïa ki ‘thei na kiwei pat ki Ri.
Ha ki snem kiba la leit noh, ka Meghalaya kaba ieit ïa ka phutbol ka la lah ban pynmih ïa ki nongïalehkai shynrang bad kynthei kiba kynsai bad kiba la shah jied ban mihkhmat ïa ka Ri India ha ki kyrdan bapher bapher naduh ki kyrdan junior haduh senior. Ka jylla Meghalaya ka la kylla long ka jaka jong ki nongïalehkai phutbol kiba don sap, bad kaba la ai mynsiem bad pynshlur ba kin lah mynta ban phohsniew ban ïoh phong ïa ka jersey jong ka Ri India.
Hynrei kaba pyndukha mynsiem ha kane ka kynti ka long ba ngim shym la ïohi ba kan don ka jingpdiang burom ïa kine ki ar ngut ki khlur ïalehkai kumba la ju leh ïa kiba bun ki samla ka jylla kiba wanrah ïa ka nam ka burom ïa la ka jong ka jylla la ka long ha kino kino ki jingïakop. Ngi da sngew sarong shi katdei eh ïa kitei ki ar ngut ki ‘thei ïalehkai, namar ym tang ba ki la long ki khlur ki ban wanrah nam ïa ka Meghalaya hynrei ki la lah ban wanrah nam bad pynthaw histori syndon ïa ka Ri, kata ban ïoh rung biang sha ka lympung AFC Cup hadien 21 tylli ki snem. Kumba ju long, ngi ju sakhi haba wan phai ïing ki khlur ïalehkai kiba wanrah nam wanrah burom, ki Synjuk ne ki kynhun bapher bapher ki ju pynlong ka jingleit pdiang ïa ki naduh Kad Liengsuiñ ha Guwahati ne na kino kino ki jaka hynrei mynta ka kynti, lait tang na ki bahaïing hasem ym don kiba kynmaw ne ban mih shakhmat ban pdiang.
Hynrei, yn nym lah pat ban kyntait ïa ka jinglong sngur bad kylluid mynsiem jong u MLA ka South Shillong Konstitwensi u Bah Sanbor Shullai, uba dei ruh u Myntri ka Sorkar Jylla uba mar ïa ïoh jingtip halor ka jingwan phai jong ki ar ngut ki khlur ïalehkai, mar mar u la pynbeit da ka jingïalang pynkup burom ïa ki ha shiteng lynti, kata ha ka por ba ki dang wan phai sha la ïing ha ka sngi U Blei ka 19 tarik Risaw, 2025. Ngi ju sakhi ba u Bah Sanbor ruh u dei uwei na ki nongïalam bad nongmihkhmat uba ieid bha ïa ki kam ïalehkai, naba ïa lade ruh u la dei uwei na ki nongïalehkai ba tbit ha ka phutbol ha ki snem bad ki por ba u dang samla namar u long u briew uba kloi ban mih shakhmat ban tynrong lem ban ïarap ïa ki nongïalehkai ha ki jingïalehkai kiba pher bapher, watla kim dei ki nongshong shnong kiba shong ba sah hapoh ka konstitwensi kaba u mihkhmat. Kham ñiar ban don MLA kum u Bah Sanbor, u bym ju peit shiliang ïano ïano bad lada phi dei uba tbit bad don sap ha ki kam ïalehkai bad phi mih khmat ïa ka Jylla ne ka Ri, u long uba kloi ban ai ki jingïarap kat kaba u lah ei kum ka dak ban ai mynsiem bad pynshlur ne ban ai ka burom kyrpang.
Ngim dei ban kheiñ dewthala ïa ki khynnah kiba don jingtbit ha ki kam ïalehkai namar jan baroh ki jingïalehkai ha kane ka juk ki dei kiba wanrah ja wanrah doh ïa ki nongïalehkai bad ki ïing ki sem jong ki. Ngi ju ïohi ba ki Sorkar bad kiwei ki ju ai da ka pisa kaba heh sha ki nongjop ha ka lympung Olympics bad kiwei. Ngim lah ban len ba ha kine ki khyndiat snem, ka Sorkar ka la pynleit jingmut ban thaw ïa ki madan ïalehkai phutbol ba la siang da u phlang plastik khnang ban ailad ïa ki nongïalehkai ban ïashim bynta ha ki jingïakhun.
