Khliehriat, Risaw 19
Ka Sakhain Moolimen SC kala long ka lahduh ha ka 2nd Division Football Tournament katba ka Daistong SC ka lahduh ha ka 1st Women’s Edition League ba la pynïaid da ka Saipung Block Sports Association (SBSA).
Kane kala wan hadien ba kine ki ar kynhun kila khur jingjop da ka jingïashut tie breaker ha ka jingïalehkai final kaba la long ha madan Lamyrsiang ha ka 18 tarik Risaw.
Haba phai sha ka jingïakhun final jong ka 2nd Division, ka Sakhain Moolimen kala jop da ka jingïashut tie breaker da 4-1 kol pyrshah ïa ka Jai Jai United hadien ba ka jingïalehkai kaba la buh bor kala kut noh khlem don mano-mano ba lah ban thep kol.
Da kaba ïoh rung sha ka jingiakhun final ka Sakhian Molimen bad Jai Jai United, mynta kila kiew sha kawei pat ka kyrdan jong ka jingïakhun, kata sha ka 1st Division ha ka samoi ïalehkai ka ban wan.
Shwa kane, ka jingïalehkai 1st Women’s Edition League hapdeng ka Daistong SC bad United Biate SC kala long kaba ïakhaid ha kaba ka por kaba la buh, ka jingïakhun kala kut da mar 1-1 kol. Hadien ba la rah ïa ka jingïalehkai sha ka jingïashut tie breaker ka Daistong SC kala jop da 3-1 kol.
Ïa ka kol jong ka United Biate SC la thep da ka Elizabeth Thianglai (53) katba ka shikol jong ka Daistong SC la thep da ka Happily Lyngdoh (57).
Hadien ka jingïalehkai, la sam khusnam sha ki kynhun lahduh bad kynhun ba wan ba ar kumjuh ki khusnam shimet sha ki ‘rang bad ‘thei ïalehkai.
Ha ka liang ki kynthei ïa ka nam Best Player of the Tournament la ïoh rah da ka Saphapaya Lyngdoh, katba ka nam Best Player of the Match la rah da ka Happily Lyngdoh baroh arngut kidei na ka Daistong SC.
Katba ha ka liang ki shynrang ïa ka nam Best Player of The Tournament la khur da u Alnes Lamare, ka nam Best Goalkeeper da u Chirup-O-tre Suja baroh arngut kidei na Sakhain Moolimen SC, katba ka nam Best Player of The Match la ïoh da u Ronsingh Shylla na ka Jai Jai United.
U kongsan jong kane ka sngi udei u Forest Pajuh, katba u symbud kongsan udei u president SBSA Victor Suja President, ha ka jingdonlang ki nongïalam bad dkhot nongkitkam ka SBSA naduh u Rimi Shadap General secretary, Jimy Bareh Auditor kumjuh u waheh shnong barim ka Lelad Enelson Bareh, u waheh shnong Jarain April Lamare nalor kiwei-kiwei.
Ïa ka jingialang sam khusnam la pynïaid da u working president Teibor Suja bad la ïoh ki kyntien pdiang burom na u Chairman Referee Mishol Paslein bad ki kynthien khublei na u Tournament Secretary Warkos Malang.
