Mawkyrwat, Risaw 19
Ka St’s Mary Higher Secondary School Rangblang ha ka 18 tarik u Risaw 2025 Kum shibynta ka jingrakhe ïa ka jingdap 50 snem ka skul ïa ka 18 tarik u Risaw 2025 ka la ïoh ban pynhap pyrda noh ïa ka lympung ïalehkai phutbol kaba tip kum ka Golden Jubilee Football Tournament 2025 ha madan St’ mary’s mini stadium, Rangblang, South West Khasi Hills District.
Ïa kane ka jingrakhe la sdang naduh ka u bnai Risaw jong u snem 2024 ban ïoh ban pynkut ha ka 31 tarik u Risaw 2025 ha kaba u bah Methodius Dkhar, Myntri ka tnat Food Civil Supply & Consumer Affairs jong ka sorkar jylla un sa wan ban khang ïa kane ka jingrakhe dap 50 snem ka skul.
Ha kane ka sngi, ka jinglehkai final ka la long hapdeng ka Selajong Fc na Mawkyrwat pyrshah ïa ka Mawthaw Rambrai YS& CC na West Khasi Hills bad ha kane ka jinglehkai final ka Rambrai ka la lah ban pynliem noh ïa ka Selajong da 5-4 kol lyngba ka Tie Breaker.
Haba phai sha kane ka jingïalehkai ka long ka itynnad bad ïakhaid bha, ha ka kylla step dei ka Selajong kaba la ïoh ban pynkhih nyngkong ïa ka jar bad haba bteng ïa ka jingïalehkai ka Rambrai da ka jinglah ban ïalehkai bha ka la ïoh ban pynïakhaid shwa ban kut ka por jong ka kylla step.
Ha ka kylla miet ka jinglehkai ka la nang itynnad shuh-shuh bad baroh ar kynhun ki la ïakhun dohïap ban thep kol ban ïoh ïa ka nam tam hynrei haduh ban da kut ka por jong ka kylla miet kim lah lah ban pynkhih jar bad pynlong ba kin ïakhaid mar shi kol bad ki nongpynïaid ki la rai ban pynlong noh da ka tie breaker.
Ha ka jingïashut tie Breaker ka Rambrai ka la lah ban pynrung haduh 5 tylli ki kol katba ka Selajong ka la lah ban pynrung tang 4 tylli ki kol.
Ïa kane ka lympung la wan ban pynhap Pyrda da u Bah Edilbert Iawphniaw uwei na ki riew Rangbah jong ka dong ka thaiñ bad u Bah Kynjai Thongni kum u sunbud kongsan ha ryngkat ka jingsakhi lang ki paidbah, ki nonghikai bad kiwei kiwei.
