Shillong, Risaw 19
Ha ka jingpyrshang ban pynsngewthuh ïa ki nongwan jngohkai pyrthei ba kin sumar khuid ïa ka mariang bad ban ym bret pathar ïa ki jaboh jabaiñ, na ka liang ka Hynñiewtrep Youths Council (HYC) Environment Cell, ha ka 18 tarik u Risaw 2025, ka la hiar sha ki surok ha ka thaiñ Sohra ban sam ïa ki kot lyngkdop sha ki nongwan jngohkai pyrthei.
Haba kren sha ki lad pathai khubor, u Bah Francis G. Mawlong, President ka HYC CEC, u la ong ba na ka jingwan tuid jong ki nongwan jngohkai pyrthei sha kane ka Jylla bunsien ki ju bret pathar ïa ki jaboh jabaiñ.
Kumta ban pynsngewthuh ïa ki, ba kin long kiba adkar bad ban ym bret pathar ïa ki jaboh jabaiñ, na ka liang ka seng ka la shim ïa kane ka sienjam ban sam da ki kot lyngkdop.
“Ngi ïohi ba na ka por sha ka por ka jingwan jong ki nongjngoh kai kiba na bar sha ka Jylla jong ngi bad khamtam eh sha ka thaiñ Sohra, teng teng ka la pyni saitmet ïa ka mei-mariang namar ka jingbret pathar ïa ki jaboh, kum ki plastik, ki pliang kot bad ki pela kot ruh kumjuh,” la ong u Bah Francis.
U la ong ba ka seng ka la sam da ki kot lyngkdop sha ki paidbah ba wan jngohkai ba kin sngewthuh ïa ka jingkor dor jong ngi wei pa i wei, khamtam eh ïa ki nongwan jngohkai pyrthei ba ki dei ban leh khuid.
Nalor kata, u la kyntu ruh ïa ki nongwan jngohkai ba kin sngewbha ban bret ïa ki jaboh jong ki ha ki jaka ba la buh ban bret.
Ka seng ka la ai jingmut rug sha ka Sorkar ba ka dei ban wanrah ïakata ka ‘Waste management’ kaba lah ban pynlang ïa ki ñiut kiba jaboh bad lehse ka lah ruh ban pynkhuid ïa kine ki jaboh, khnang ba lah ban pyndonkam biang ha kiwei pat de ki bynta, u la ong.
U Bah Francis u la ong ruh ba ka seng kan sa leit pat sa ha kiwei pat de ki jaka, khang ban ngin ïoh ban sam ïa kine ki kot lyngkdop, ban pynsngewthuh ïa ki nongwan jngohkai pyrthei.
