Shillong, Risaw 19
Ka Dorbar Shnong Nongrah ha ka 18 tarik u Risaw 2025, ka la pynlong ïa ka jingthang mombati kum ka dak ban pynpaw ïa ka jingsngew-lem halor ka jingkhlad noh jong u heprit Kyrshanbor Kharmudai.
La sakhi ba da ki spah ngut ki paidbah ki la wan ban tuid ha kane ka jingthang mombati sngewlem bad na ka liang ka Myntri barim ka Sorkar Jylla, ka Kong Ampareen Lyngdoh ruh ka la wan ban shim bynta lang.
Kum ban shu pynkynmaw ba u heprit Kyrshanbor Kharmudai, ba dang 7 snem ka rta uba shong ba sah ha Nongrah Lummarboh, u la jah na la ïing ha ka janmiet jong ka 8 tarik u Risaw 2025, bad ha ka jingïawad shnong ryngkat ki bor pulit, la lap noh ïa ka metïap jong u ha ka sngi kaba bud na kawei ka khlaw ha Mawpat.
Haduh mynta ki bor pulit kim pat lap ba mano ba donkti ban shim ïa ka jingim jong u heprit Kyrshanbor Kharmudai.
Ha kane ka jingthang mombati la wan ban ïashim bynta ruh ki bahaïing hasem jong u heprit Kyrshanbor Kharmudai.
Haba kren ha kane ka jingïalang thang mombati u Bah Pynshai Pyngrope, Secretary Shnong Nongrah u la ong ba mynta ka la ïaid la shiphew sngi ka jingkhlad noh jong u heprit Kyrshanbor, ki pulit kim pat ïoh kem ïa ki runar kiba donkti ban shim ïa ka jingim jong u.
“Ka shnong ka don ha ka jingshong syier mynta namar ba ki pulit kim pat lap ïa kiba donkti ban pynïap ïa u heprit Kyrshanbor Kharmudai,” la ong u Bah Pynshai.
Shuh shuh u la ong ba u heprit Kyrshanbor u dei u khun swet uba la duh noh ïa la ki kmie ki kpa bad uba wan na ka ïing ka sem kaba duk.
Kumta u Bah Pynshai Pyngrope u la kyntu ïa ka Sorkar ba kam dei ban shu kyntu tang ïa ki kmie ki kpa ba kin sumar ïa la ki khun, hynrei ka dei ban pyrkhat ruh ïa kito ki khun kiba la duh ïa la ki kmie ki kpa jong ki.
Halor ka jingshah pynïap i heprit Insaphira Lyngdoh Mawnai u Bah Pynshai u la ong ba ka shnong bad ka jaitbynriew kam pat hun satia ïa ki kaiphod ba la ai da ka tnad pulit halor ka jingkhlad noh jong i. “Ngi kyntu ïa ka tnad pulit hapoh ka jingïalam u Bah Vivek ba kin pynïoh noh kham kloi ïa ka hok jong i ne i heprit,” u la bynrap.
