UK, Risaw:
Ki pulit jong ka United Kingdom ki dang pyrshang ban wad ia ki dak ki shin ha ka mukotduma bym pat lah ban pynshai halor ka jinglap ia ka metiap jong kawei ka khunlung kynthei ha u snem ba la dep ha Ashtons Field, Little Hulton, jong ka Greater Manchester. Ki pulit ki la ong ba imat ki nongbret ki la dep buh shuwa ia ka hapoh ‘Fridge’ lane ka ‘freezer’ haduh kumba “ar ne lai snem” shwa ban lap noh syndon ia ka.
Ha ka jingpynbna kaba thymmai, ki pulit ki la pyllait ia ka dur jong ka jaiñ, kaba la sop ia katei ka khunlung, ha ka por ba la lap ia ka, da kaba kyntu ia ki kmie ki kpa jongka, ba kin mih shakhmat ban phla ia kaei kaba la jia baroh. Katei ka jaiñ ba la sop ia katei ka khunlung ka dei ka jaiñ kynthei hi kaba heh kaba rong pink bad kaba don ia ka dur jong ka kada, ba la ikop ban thied nabar ri bad ka bym ju kham ioh ia katei ka jaiñ hapoh UK.
Ia katei ka khunlung kynthei, ba la buh kyrteng kum ka ‘Baby Ava’ da ki pulit jong ka Greater Manchester (GMP), la lap da u nongleit ïaid kai ha ka 20 tarik u Naiwieng, jong snem 2024. La ikop ba kan dang don tang kumba 38-39 taiew ha katei ka por ba la shem ia ka bad lehse ka kmie kaba kha ia katei ka khynlung ka dei kaba la shu leit kha ha ki jaka sumar shimet bad ka bym shym la pynrung kyrteng bad ka sorkar.
La shem ia ka na kawei ka thliew ba la tep ia ka bad kaba jylliew tang kumba 12cm hynrei la lap ia ka ha jrong jongka lyngkha kaba la sop da u thah imat hadien ba la sei ia katei ka khunlung na katei ka thliew da ki myrsiang ne kiwei pat ki mrad kiba ju bam doh.
Ki pulit ki la iathuh ba hadien ba la dep ban peitbniah bad wad lyngba jong katei ka jaiñ, la ioh ia ka DNA kumba ju long hi, hynrei katei ka DNA kam shym la lah ban ithuh ia ki kmie ki kpa jong katei ka khunlung bad kumta, ka long kaba shem jingeh ia ki pulit ba kin lap ia ki kmie- ki kpa jongka.
