Shillong, Risaw 19
Ka tnad pule Sociology jong ka Captain Williamson Sangma State University, Balalgre, Tura, kan pynlong ïa ka Lympung Ïathir ba shi sngi halor ka phang “Indigenous Knowledge Systems (IKS): Sustainable Future” ha ka 22 tarik Risaw, 2025.
Kum shi bynta jong ka jingkular ka skulbah ban kyntiew ïa ki kam wad bniah bad jingïalang halor ka jingstad tynrai, ka kolshor, bad ka roi ka par kaba neh, kane ka Lynpung Ïathir ka thmu ban lum lang ïa ki ‘riewstad, ki nongwad bniah, bad kiba don bynta ha kane ka kam ban ngam jylliew ïa ka bynta jong ka jingstad tynrai ha ka ban weng ïa ki jingeh ha kane ka juk ba mynta.
Ka jingïalang plie kan sdang ha ka por 10:00 baje mynstep ha phyllaw jong ka skulbah, ha kaba ka Hema Nayak, IAS, Deputy Commissioner ka South West Garo Hills, kan long kum ka Kongsan. Ïa ka jingkren ba kongsan yn kren da u Prof. Bodhi Sainkupar Rani, Associate Professor bad Chairperson, Centre for Social Justice and Governance, School of Social Work, Tata Institute of Social Sciences, Mumbai.
Ka kylla khatduh jong ka jingïalang kan long ha ka por 3:00 baje mynsngi ha kane kajuh ka sngi, ha kaba ka Dr. Vasanthi Vijaykumar, Vice Chancellor, Captain Williamson Sangma State University, kan long kum ka Kongsan.
Ha kane ka lympung yn don ki ‘riew shemphang ne ‘Resource Person’ kiba pawnam na kylleng ka ri bad ki nongïashim bynta bapher-bapher na ka Jylla, ka ban pynroi ïa ka jingïamir jingmut bad ka jingïatreilang halor ki jingïohi jong ki trai-ri trai-muluk na ka bynta ka lawei kaba neh.
