Shillong, Risaw 20
Ka Nongkseh SC ka la pynliem noh ïa ka Nongrah SC da 4-0 kol na ka bynta ban bteng ïa ka jingjop kaba saw ha ka lympung ïalehkai 1st Division Football League 2025 ba la pynïaid da ka Shillong Sports Associa-tion ha ka lah sngi U Blei.
Kane la la wan urlong lyngba u Banskhemlang Mawlong, Mebankhraw K Wahlang, Hardy C Nongbri bad u Kitboklang Pale na ka bynta ban lamkhmat ha kane ka lympung.
Ha kane ka jingïakhun, ka Nongkseh ka la lah ban ïalehkai bha naduh kaba sdang ha kaba ka ïoh ban thep mar kol ha ka kylla step bad kylla miet. Kane ka kynhun hapoh ka jingïalam u Bah Richard Nongneng ka la ïoh ban thep ar kol hapoh 20 minit lyngba u Banskhemlang (16) bad u Mebankhraw (18).
Hadien katto katne por ba la bteng ïa ka jingïakhun jong ka kylla miet ka Nongkseh ka la thep biang sa ar kol lyngba u Hardy (52) bad u Kitboklang (64) na ka bynta ban khur syndon ïa ka jingjop. Da kane ka jingjop ka Nongkseh ka la ïai bteng ban lamkhmat ha kane ka lympung da kaba kamai 12 point na ki saw sien ïakhun bad ka la tam da 3 point ïa ka MLP, kaba bat ïa ka kyrdan ba-ar.
Ka jingïalehkai ha ka sngi Ba-ar kan long hapdeng ka Mawtawar SC pyrshah ïa ka Nong -krem SC ha ka por 1:15 mynsngi.
