Shillong, Risaw 20
Ka Hynñiewtrep National Youth Front (HNYF) Southern Border Area ha ka 20 tarik u Risaw 2025, ki la rai ba kin pynlong da ka jingïakhih khlem buhpor naduh na shnong Jyllep, ban khang ïa ki kali barit, ki kali kit marbam , ki trok kit dewbilat, ki trok kit coke bad lait noh tang ïa ki kali kit nongpang.
Kane ka rai ka seng kadei hadien ba la shong pyrkhat lang naduh ki nongkamai tourist na ka dong ka thaiñ Dangar – Balat, East Khasi Hills, ban ïa kren bad ïathir ha kaba ïa dei bad ka jingsniew bad ka jingjot rathai shaba palat ka surok ha ka thaiñ naduh na shnong Tlongpleng ter-ter shaduh ki thaiñ Dangar, Balat.
Ha kane ka sngi, na ka liang ki nongkamai tourist ki la ïasnoh kti lang bad ka seng ban ïa poi ryntih sha kane ka jingïakynduh, ba la pynlong ha shnong Dangar, ban ïa thir jingmut kumno ban ïa shim rai la kin ïa leh kumno ha kaba ïa dei bad ka jingsniew palat kane ka surok.
Ha katei ka jingïalang ba la long ha ka shnong Dangar, ki nongñiah tourist ki la pynsngew ïa ki jingeh ryngkat bad ka jingïa kren phylliew jingmut.
Kumta ka HNYF bad ka kynhun ki nongñiah tourist ki la shim ïa ka rai ba kin pynlong da ka jingïakhih khlem buhpor naduh ka janmiet jong ka 20 tarik u Risaw 2025, ha ka shnong Jyllep ban khang naduh ki kali barit, ki kali kit marbam, ki trok kit dewbilat bad pyllait tang ïa ki kali kit nongpang.
U President ka HNYF Southern Border Area u Bah Kyllang Thongni u la ong ba kane ka jingïakhih kan kut tad haduh ba ka Sorkar kan ai jubab bad kular ban pynbha bad ai noh da ka surok kaba paka bad kaba khamheh.
“Kane ka jingdawa jong ngi kam dei shuh kaba dang thymmai hynrei ka la dei kaba la sah teng naduh mynshwa. Ngi lah dep ban pynlong ïa ka jingïakhih ha u snem ba la leit bad na ka liang ka PWD ruh ka la pyrshang kat lah kat ïai da ka bor jong ka, lyngba u EE ka Mawsynram PWD roads ban maramot ïa ka surok hynrei tang hadien ar bnai ka surok ka la pra biang,” la ong u Bah Kyllang.
Kumta u la ong, “Ngim kwah shuh ban ïohi ïa ka jingmaramot hynrei ngi angnud ba ka Sorkar ka dei ban ai noh ïa ka surok kaba paka bad ka surok kaba heh”. “Kumta ngi la rai ban pynlong da ka jingïakhih ban khang ïa ki kali ba ïaid, haduh ba ka Sorkar Jylla kan sngap ïa ka jingdawa,” u la bynrap.
