Shillong, Risaw 20
U Secretary ka Meghalaya Pradesh Congress Committee u Bah Manuel Badwar u la buh ka jingkyrpad ïa ka Sorkar ba kan ai bor pahara ïa ki nongshong shnong ka Lapangap tang ba kin ïoh ban ot ïa u kba uba ki la trei shitom baroh shisnem.
U Bah Manuel Badwar haba ïakren sha ki nongthoh khubor u la ong ba naduh u snem 2021-22 ka la don ka jingïakhih bad ka Sorkar ka la dei ban ïakren baroh ki jaka khappud ha ka jingïakren pynbeit pud bad ka Sorkar Assam, hynrei balei la shu pynbeit tang ha ki jaka ba kham biang ka jingkamai kajih.
U Bah Manuel u la ther ruh ïa ka Sorkar Jylla ba ka shimkhia ban pynbeit ïa u pud u sam tang ha Khanapara, katba ïa ka jingïakynduh jingeh kiwei pat kiba shong ha ki jaka khappud ka khlem shimkhia. “Ka border te, ka dei hi ka border, la ka dei ha ka jaka kyndong ne ha jaka ba long sor, kane ka jingleh jong u Conrad K Sangma ka long tang ban ïoh myntoi shimet jong mano re mano kiba don bad u, hynrei isynei pat na ka kane ka jingleh jong ki ka pynkynduh jingeh ïa ki thaiñ nong-kyndong,” la bynrap u Bah Manuel.
U la ong ba na ka liang ka party Congress kan sa leit ban jurip ha shnong Lapangap, ban ïoh ïakynduh bad ban sngewthuh kham bniah ïa ki jingeh jong ki. “Ka bor ka shong ha ka Sorkar, hynrei watla katta ka party kan pynbor ïa ka Sorkar ban peit bniah namarba ka Sorkar ka donkam ban ïakren pynbeit bad ka Sorkar Assam.” U la ong.
“Ka Sorkar Assam kan ym sngap ïano ïano, hynrei kan sngap beit tang ïa ki ophisar bad ki briew kiba la buh ban don ha ka Committee ka ban pynbeit pud, kyrmen ba ka NPP kan khih jingmut, namar ban shu ieh sah kumne kam lah ban long bad ka Sorkar kam dei ban leh tang ban ïoh jingmyntoi ïalade, hynrei kaba donkam ka dei ban peit lang ïa ki paidbah, kumjuh ruh ymdei tang kiba shong ha khappud ban sngewthuh ïa kine ki jingeh, hynrei baroh ki ba shong ha ka Jylla ba kin shai haba ïadei u pud u sam” la ong u Bah Manuel.
Haba ïadei ka jingong u Myntri Rangbah ka Sorkar Assam u Himanta Biswa Sarma ba u la pynthikna ba ka Block-I bad Block-II kin hap ha West Karbi Anglong hapoh u pud u sam ka Karbi Anglong Autonomous Council, u Bah Manuel u la kyntait ban ong eiei hynrei u la ong ba ka donkam ban ïa peit shuwa ïa ki shnong bad ki jaka lajong. “Ai ba ka Sorkar kan kren eiei haba ïadei katei ka jingkren u Myntri Rangbah ka Assam.”
U Bah Manuel u la ong, ” Ai ba ka jingïakren haba ïadei ban pynbeit ïa u pud u sam kan bteng, kaba donkam ka long ba ki briew, haba ki la rep ha ki pynthor kba ki dei ban ïoh ban ot ïa u kba, hynrei ban ym shah ban ot ïa u kba ba ki la trei shitom, ka bym lah ban long, kan eh aiu ba ka Sorkar kan ai bor pahara ïa ki nongrep ba kin ïoh tang ban leit ot kba, hynrei ban shu ai korphiw sah kumne ka long kumba ka Sorkar kam sngewthuh ba ki briew ki dang im da ka kam rep.”
