Shillong, Risaw 20
Ka Inter Parish Football Tournament 2025 jong ka Synjuk ki Seng Rangbah Katholik Shillong Archdio-cese Zone 1 ka la kut noh ha ka sngi Saitjaiñ ha madan Heh Mini Stadium, Mawlai Phudmuri.
Ha kane ka Zone-1 ki don 6 tylli ki Parish, ka Mawlai, Mawiong, Mawprem, Mawtawar, Pynthor-umkhrah bad ka Mawkhar. Na kine ki 6 lait noh tang ka Mawkhar Parish kaba khlem ïashim bynta.
Ha ka kyrdan ïakhun jong ka Below 40 ne 40 snem shapoh la ïoh rah nam lahduh da ka Mawïong Parish kaba la lah ban pynliem ïa ka Mawlai Parish 4-3 kol lyngba ka tie-breaker ha ka jingïakhun ia ka final.
Kine ki ar tylli ki kynhun ka Mawïong bad ka Mawlai ki la poi sha ka jingïashut penalty hadien ba ki la ïakhaid da 1-1 ha ka jingïakhun ba 70 minit bad ki khlem ïakhun shuh ïa ka extra time, ha kaba ki nongpynïaid ki la rai beit da ka penalty.
Katba ha ka jingïakhun ïa ka final ba ar jong ka Above 40 ne 40 snem shaneng ka Mawlai Parish ka la jop ïa ka Pynthor Parish da 5-1 kol ha ka final ban rah ïa ka nam lahduh ha kane ka kyrdan ïakhun.
Ha kane ka sngi la sam ruh ïa ki khusnam shimet, ha kaba ïa ka nam Top Scorer ha ka Above 40 la ïoh da u Angelus Biam bad ha ka Below 40 ka la leit sha u Kenny Lynrah. Katba ïa ka nam Best Goalkeeper ha ka Above 40 la ïoh da u bah Peter G. Lamare bad na ka Below 40 pat la ïoh da u Freddy Nongrum, baroh kine ki saw ngut ki dei na ka Mawlai Parish.
Kane ka sngi kut ka la long kaba iphuh iphieng da ka jingdon ryngkat u Bah Gabriel Wahlang, MLA ka Nongstoiñ kum u kongsan bad u Bah P.T Sawkmie, MLA barim kum u symbud kongsan.
Kiwei kiba la ïa don lang ha kane ka sngi ki long u Fr. T. Nonglang na ka Mawlai Parish, Bah Stenis L. Nongkynrih President ka Synjuk ki Seng Rangbah Katholik Shillong Archdiocese Zone 1, Bah Germanystar Rani, Vice President, ki longkmie ka Balang Katholik bad kiwei kiwei.
