Nongstoiñ, Risaw 20
Uwei u rangbah ba la 43 snem ka rta uba la tip kyrteng kum u Phyrnailin Nongrem napoh ka shnong Mawkhlam-Nongpyndeng ha West Khasi Hills u la jah na la ïing naduh ka 13 tarik u Risaw 2025 bad haduh mynta u khlem wanphai ïing shuh.
Ka tyllong khubor ka ong ba utei u rangbah u la jah na la ïing naduh ka janmiet jong katei ka sngi hynrei haduh mynta ym shym la tip bad ïohi shano u leit.
Shuh shuh la ong ruh ba halor kane ka jingjah jong une u rangbah, kiba ha ïing ki la pyrshang ban leit wad kylleng ki jaka kiba u ju kham leit bad ki la kylli ruh na ki lok ki jor kiba u kham ïajan hynrei ym shym la don satia ba ïohi ne lap ïa u.
La ong ruh ba halor kane ka jingjah, kiba ha ïing ki la pyntip sha ki bor pulit bad ki bor shnong bad kiba ha ïing mynta ki dang bteng ban leit wad sa sha ki khlaw ki btap bad ki lum ki wah kiba u ju kham sngewtynnad ban leit.
Na ka liang ki pulit ruh ki la ïathuh ba kin sa shim ïa la ka jong ka bynta ban wad jingtip halor ka jingjah jong utei u rangbah bad la kyntu ruh ïa kino kino kiba ïohi ne lap ba kin sngewbha ban pyntip sha ka Police Control Room ha u number 9366498499 lane phone sha kiba ha ïing hasem ha u number 9774296991, 7005938801.
