Shillong, Risaw 20
Ka kynhun ki ‘thei ïalehkai ka India kan pynkhreh ïa ka jingïakhun ba nyngkong jong ka ha ka Tri-Nation International Friendly pyrshah ïa ka IR Iran ha ka Ba-ar ha madan Jawaharlal Nehru, Polo ha ka por 6 baje janmiet.
U coach ka kynhun u Crispin Chettri u la ong ba kane ka dei ka jingsdang jong ka bynta ba kongsan jong ka jingpynkhreh shwa ka AFC Women’s Asian Cup Australia 2026 ka ban long ha u snem ban wan, bad ka lad ban tynjuh ïa ki jingïalehkai ba thymmai bad ki sap ba thymmai.
“Hadien ka jingïalehkai jong ka lympung ïaknieh ha ka Asian Cup, kane kan dei ka jingïalehkai kaba nyngkong eh jong ngi ha kine ki saw bnai. Ngin sa pyrshang ban ïalehkai bha bad ngi dang peit ruh ïa ki katto katne ngut ki ‘thei ïalehkai ba thymmai,” ong u Chettri ha ka jingïalang bad ki nongthoh khubor shi sngi shwa ban sdang ka jingïakhun.
“Ngi la pynrung katto katne ki ‘thei ïalehkai kiba thymmai sha kane ka kynhun na ka bynta ka Rajmata Jijabai Trophy khnang ba ngin lah ban sei ïa ka kynhun ïalehkai kaba khlaiñ bor na ka bynta ka lawei.”
U Chettri u la pynpaw ka jingsngewnguh ïa ka jingpdiang sngewbha ha Shillong bad ki jingdonkam ba la pynbiang na ka bynta ka jingkilanmet jong ka kynhun. Ka dei ka sien kaba nyngkong hadien khyndai snem ba ka India kan ïakhun ha Shillong hadien ka jingïakhun jong ka South Asian Games ha u snem 2016. Ka IR Iran bad ka Nepal kin ïakhun ha ka 24 tarik bad ka India kan pynkut noh ïa ka jingïalehkai ba khatduh pyrshah ïa ka Nepal ha ka 27 tarik.
