Shillong, Risaw 20
Ka jingmih khubor ban kylliang shuki President ka Meghalaya Pradesh Congress Committee ka dei tang ka jingpynbud nam, na ki katto katne kiba kwah ban wanphai biang sha ka party, hynrei na ka party hi kam don kaba kum kata.
Ïa kane la kren da u Secretary ka Meghalaya Pradesh Congress Committee (MPCC) u Bah Manuel Badwar ha ka jingïakynduh ki nongthoh khubor ha ka lah sngi u Blei.
U Bah Manuel Badwar haba ïakren sha ki nongthoh khubor u la ong, ha ka party hi, ka khlem don ka jingïakren ban kylliang President bad ïa kita ki jingïakren ruh ka party kam don jingtip eiei, lehse kane ka jingong ka dei na ki nongïalam jong kiwei ki party ba mynta ki la kwah ban wanphai, hynrei ki tieng ïa u Bah Vincent H. Pala namar ha ka por ba ki mih na ka party ki la kren tam bad kynthoh palat ïa ka party bad na ka jingdon jong u kum u President ki shynraiñ ban wanphai bad ki kwah ba un hiar shuki.
U Bah Manuel u la ong, ha ka jingpeit jong u, ym pat don uba lah ban long President kum u Bah Pala uba skhem jingmut, uba skhem nongrim, “Haba ngi don kum une u nongïalam uba skhem ban ïalam ïa ka party, kam long kaba dei ban beh ne ban pynhiar shuki ïa u” u la ong.
“Ka jingkhlaiñ jong ka party hi kam dei tang na ka jingïalam u President, hynrei ka dei ruh ban don ka jingïatreilang naduh na ki Block bad ki Unit,” u la ong.
U Bah Manuel u la kyntu ïa kino-kino kiba sngewïeid bad ba sngew donkam ba dei ban pynkhlaiñ ïa ka party, ki dei ban mih shakhmat, hynrei ym ban shu ïakynnoh da kumne kumtai.
“Kane ka jingmih jong kine kiei-kiei ruh ka dei namarba ki briew ki la sdang sngewthuh ba ka party Congress ka la sdang khlaiñ bad kiba bun ki briew kiba kwah ban wan pynïasoh sha ka Party, nga sngewthuh ba ka party kan sa ïeng rasong biang bad lehse don ki nongïalam sain pyrthei kiba kwah kynthih shane shatai hynrei kim nud ban wanphai sha ka party bad ki shu pynthohbria kumne kumtai” la ong u Bah Manuel.
Shuh-shuh u la ong, ba u sngewthuh ba u don ha ka party kaba biang, kaba khlaiñ bad u kyrmen ruh ba ka party ka la nangkiew shuh-shuh ha ka Jylla. U la ong ba “Kiba trei hapoh ka party ki sngewthuh khambha bad ym don jingthud eiei ha ka jingïatreikam bad u Bah Pala namar u long u briew u ba beit bad u ba ïaid shakhmat”
U Bah Manuel u la pynshai ruh ba ka jingong ban wan u Mallikarjun Kharge, u President ka All India Congress Committee, kam don jingïadei ban ong ba un wan pynkylliang shuki, hynrei ka dei ka jingwan jngoh ïa ka party ba kum u nongïalam u dei ban wan peit ïa ka party hapoh ka Jylla Meghalaya.
